Макрон Путиндан терроризмга қарши курашда ҳамкорликни кучайтиришни сўради

Елисей саройи томонидан берилган баёнотга кўра, Макрон Путиндан терроризм ва ноқонуний иммиграцияга қарши курашда ҳамкорликни кучайтиришни сўраган.

Кремль томонидан берилган баёнотда, Путин 16 октябрь куни Париж яқинидаги Конфланс-Цент-Ҳонорин округида ўқитувчи вафот этгани учун Макронга ҳамдардлик билдиргани айтилган. Икки давлат раҳбарлари терроризмга қарши курашда биргаликдаги саъй-ҳаракатларни кучайтиришга келишиб олишгани билдирилган.

Франция расмийлари юқоридаги қотилликда гумон қилинаётган шахс Москвада туғилган чечен эканлигини таъкидлашган.

«Бу қотилликнинг Россия билан ҳеч қандай алоқаси йўқ. У (ўқитувчини ўлдирган қотил) Франция томонидан қабул қилинган ва бу мамлакатда 12 йилдан бери яшаб келган», — дейилган Париждаги Россия элчихонаси баёнотида.

Шунингдек, мамлакат раҳбарлари Тоғли Қорабоғдаги вазиятни ҳам ўзаро муҳокама қилишган.