Покистон бош вазири Цукербергдан исломофоб контентларни тақиқлашни сўради

Покистон ҳукумати твиттерда жойлаштирган мактубда Имрон Хон ижтимоий медиа платформалари, айниқса, фейсбук орқали тобора кучайиб бораётган исломофобия бутун дунё бўйлаб экстремизм ва зўравонлик ошишига олиб келаётганини таъкидлаган.

«Сиздан Ҳолокост учун қилганингиз каби Исломга қарши нафратни уйғотувчи исломофоб контентларни фейсбукда ман этишингизни сўрайман», – деган Хон.

Фейсбук бу ой Ҳолокостни рад этган ёки бузиб кўрсатган ҳар қандай контентни тақиқлашини маълум қилган эди.

Хоннинг мурожаатига жавобан фейсбук вакили Reuters агентлигига компания ҳар қандай нафратга қарши эканлигини, ирқ, этник ва миллий келиб чиқиши ёки динига асосланган инсонларга ҳужум қилинишига йўл қўймаслигини айтган.

«Биз бундай контентларни аниқлашимиз биланоқ олиб ташлаймиз», — деган фейсбук вакили электрон почта орқали юборилган баёнотда ва компаниянинг ҳозирда «ишлари жуда кўплигини» қўшимча қилган.

Якшанба куни Хон Франция президенти Эммануэл Макрон Муҳаммад алайҳиссалом тасвирланган карикатураларни намойиш қилишни рағбатлантириши орқали «Исломга ҳужум қилганини» айтган эди.