Францияда такроран умуммиллий карантин жорий қилинади 

Францияда коронавирус тарқалишининг иккинчи тўлқини кузатилаётгани ортида 30 октябрдан бутун мамлакат бўйлаб ўзини яккалаш режими жорий қилинади. Карантин вақтида французларнинг ҳаракатланиши учун махсус рухсатнома керак бўлади.    

Карантин киритилишини Франция президенти Эммануэль Макрон миллатга видеомурожаатида маълум қилди. 

“Мен жума кунидан вируснинг тарқалишини жиловлашга ёрдам берган ўзини яккалаш режими тикланишига қарор қилдим. Бизнинг мақсад кунлик касалланиш ҳолатлари сонини ҳозирги 40 мингдан 5 минггача туширишдир”, деб айтган Макрон ва карантин камида 1 декабргача амал қилишидан огоҳлантирган.

Аҳолига ишга, шифокор ҳузурига бориш, харидлар амалга ошириш ва сайр қилиш учун уйларини тарк этишга рухсат берилади. Янги қоидаларга кўра, французлар уйларидан 1 кмдан узоқлашмаган ҳолда бир соат сайр қилишлари мумкин бўлади. Карантин вақтида ҳаракатланиш учун уч турдаги рухсатнома жорий қилинади: шахсий, ишга (иш берувчидан) ва мактабга бориш учун.    

Карантин вақтида мактаблар, лицейлар ва болалар боғчалари очиқ қолади. Олий таълим муассасалари масофадан ўқиш режимига ўтказилади.

Французларга ҳудудлараро ҳаракатланиш тақиқланади. Барча ресторан, бар, бистролар ва баъзи турдаги дўконлар ёпилади.

Макроннинг таъкидлашича, банклар, заводлар, қишлоқ хўжалиги корхоналари, қурилиш ташкилотлари ўз фаолиятини давом эттираверади.

Макрон Шенген ҳудудининг ички чегаралари очиқ, ташқи чегаралари эса ҳозирча ёпиқ қолишини маълум қилган. Унинг таъкидлашича, хорижда бўлган французлар ватанга қайта оладилар. Шу билан бирга у Европа иттифоқига келувчилар коронавирусга тест топширишлари кераклигини таъкидлаб ўтган.

Макрон иккинчи тўлқин биринчисидан кучли бўлишидан огоҳлантирган ҳамда аҳолини карантин вақтида иложи борича уйда қолишга ва барча эҳтиёт чораларига риоя қилишга чақирган.

Францияда биринчи карантин 17 мартдан 11 майгача амал қилган. Охирги кунларда мамлакатда коронавирусга чалиниш ҳолатлари сони кескин кўпайган. Сўнгги суткада Францияда 36 мингдан кўпроқ касалланиш ҳолати қайд этилган. Пандемия бошидан бери эса касалланганлар сони 1,2 млндан ошиб кетган, 35 мингдан кўпроқ киши вирус қурбонига айланган.