Франция COVID-19 беморларини даволаниш учун Германияга жўнатмоқда

Париж ҳукумати келаси ҳафта охирида аксарият шаҳарлардаги шифохоналарда жой қолмаслигидан хавфсирамоқда.

Фото: Reuters

Францияда бир ҳафта аввал локдаун жорий этилганига қарамасдан, коронавирус тарқалиши суръати сусаймаяпти.

6 ноябрь куни 58 мингта янги ҳолат аниқланиб, пандемия бошланганидан буён энг юқори кўрсаткич қайд этилди. Шу сабабли ҳукумат антивирус чоралари кескинлашишини эълон қилди.

Парижда соат 22дан кейин таом ва алкоголли ичимликлар сотиш тақиқланди.

Гимназиялар ўқувчилари қисман онлайн таълимга ўтади. Аммо Таълим вазири Жан-Мишель Бланкенинг таъкидлашича, машғулотларнинг 50 фоиздан кам бўлмаган қисми синфларда ўтказилиши лозим.

Баҳордан бери биринчи марта франциялик беморлар яна Германия шифохоналарига жўнатилмоқда. Гранд-Эст регионидан камида уч нафар бемор даволаниш учун Саар федерал ерига жўнатилди. Ҳукумат буни маҳаллий шифохоналарга тушадиган босимни камайтиришга уриниш деб изоҳлади.

Франция шифохоналарининг интенсив терапия бўлимларида ҳозирда 4200дан ортиқ бемор ётибди. Париж ҳукумати келаси ҳафта охирида аксарият шаҳарлардаги шифохоналарда жой қолмаслигидан хавфсирамоқда.

Тайёрлаган Дилшод Аскаров

#Франция #коронавирус

2019 йилнинг декабрь ойи охирида Хитойнинг Ухань шаҳрида номаълум вирус тарқала бошлади. Бу вирус ҳаво орқали одамдан одамга юқади ва ўлимга олиб келади.