Руминиядаги шифохонада чиққан ёнғинда 10 бемор ҳалок бўлди

Руминиянинг шарқида жойлашган Пьятра-Нямц шаҳридаги шифохонада коронавирусдан даволанаётган 10 бемор ҳалок бўлди.

Фото: AP

Ёнғин шифохонанинг коронавирусга чалинган беморлар ётган анестезия ва интенсив терапия бўлимида чиққан. Фожиа оқибатида 10 киши ҳалок бўлган, 7 киши жабрланган. Ёнғин сабаблари ҳозирча номаълум.

Барча жабрланувчилар оғир аҳволда бўлиб, ёнғин вақтида бўлимда ётган яна 6 киши бошқа шифохонага ўтказилган. Воқеа жойига Руминия соғлиқни сақлаш вазири келган. Прокуратура воқеани тергов қилишни бошлаган.

Reuters ахборот агентлигининг таъкидлашича, ушбу ёнғин мамлакатда охирги 5 йил ичидаги энг кўп қурбонга олиб келган ёнғин бўлди. 2015 йилда пойтахт Бухарестдаги тунги клубда чиққан ёнғинда 60дан кўпроқ киши ҳалок бўлганди. Ўшанда фожиа мамлакатда оммавий норозиликлар бошланишига олиб келган. Намойишчилар коррупция ва масъулиятсизликка қарши норозилик билдиришган.