«У ғалаба қилди», «мен ҳеч нарсани тан олмайман». Трамп ўз мағлубиятини тан олган ва дарҳол рад этган икки твит

Шу билан биргаликда, Трамп бу натижа «сайловлардаги сохтакорлик» эвазига бўлганини айтган, лекин у бу гапи учун бирор далил келтирмаган.

«У шунинг учун ғалаба қозондики, сайловлар қалбакилаштирилганди. Кузатувчилар овозларни ҳисоблашда иштирок этишга қўйилмади. Ёлғончи матбуот эса сукут сақламоқда!» дея ёзган Трамп твиттерида.

У овоз бериш учун ускуналар ва дастурий таъминот ишлаб чиқарувчи Dominion Voting Systems хусусий компаниясини «обрўси тушган» ва яроқсиз ускуналарга эга бўлган компания деб атаган. Трамп бу компания сўл демократларга тегишли эканини таъкидлаган ва сайлов кечасида юз берган барча механик носозликларни демократларнинг овозларни ўғирлашга уриниши деб баҳолаган.

Dominion Voting Systems компанияси бир неча марта дастурий таъминот билан боғлиқ муаммолар ҳақидаги хабарларни рад этиб баёнот берган, Америка сайлов комиссияси вакиллари ҳам тизим аъло даражада ишлаётганини билдиришган. Пайшанба куни сайловлар вақтида компютер тизимлари хавфсизлиги масаласига жавоб берадиган агентлик ҳам баёнот берди: «Бирор овоз бериш тизими овозларни олиб ташлагани, йўқотгани ёки ўзгартиргани бўйича ҳеч қандай далил йўқ. Унинг ишончлилигини шубҳа остида қолдирадиган қандайдир носозлик ҳам бўлмаган».

Оммавий ахборот воситаларида Трамп амалда мағлубиятини тан олгани тўғрисида сарлавҳалар пайдо бўла бошлагач, Трамп яна икки твит ёзди. Бу твитларида у президент мағлуб бўлганини тушуна бошлади, деган хулосага келган демократлар ва Америка нашрларининг умидларини чиппакка чиқарди.

«У фақат ёлғончи ОАВ кўз ўнгида ғолиб. Мен ҳеч нарсани тан олмайман! Ҳали барчаси олдинда. Бизни олдинда ҳали катта йўл кутмоқда. Бу сохталаштирилган сайловлар эди!» – дея ёзди Трамп.

Унинг твиттерида яна бир ёзув пайдо бўлди: «Қалбаки сайловлар. Биз ғалаба қиламиз».

Трамп ва унинг тарафдорлари сайлов натижалари эълон қилиниши бошланганидан буён кенг кўламли сохталиклар ҳақида гапириб келишмоқда, аммо бу айблов учун арзирли далил келтиришмаган. Америкалик судялар Трамп штабининг даъволарини рад этишмоқда.

Байденнинг Оқ уйдаги бўлажак маъмурияти раҳбари этиб тайинланган Рон Клайн NBC телеканалига берган интервюсида Трампнинг сўнгги твитлари билан боғлиқ вазият юзасидан изоҳ берди: «Доналд Трампнинг твиттери Жо Байденни президент қилиб қўймайди ва уни президентликдан маҳрум эта олмайди ҳам. Бу ишни Америка халқи қилади».

Доналд Трамп жума куни Оқ уй боғида ўтказилган брифингда илк бор президент бўлмай қолиши эҳтимоли ҳақида гапирганди. Пандемияга қарши кураш борасида амалга оширилаётган ишлар ҳақида гапирар экан, у сайлов якунлари бўйича шакллантириладиган кейинги администрацияга ўзи раҳбарлик қилмаслиги мумкинлигини, кейинги администрация қанақа бўлишини «вақт кўрсатиши»ни айтганди: «Идеал ҳолатда биз изоляцияга кирмаймиз. Мен кирмайман, ҳозирги администрация изоляцияга кирмайди. Келажакда ҳам содир бўлмаслигига умид қиламан – кейинги администрация қанақа бўлишини ким билади? Ўйлайманки, вақт кўрсатади. Аммо мен шуни айта оламан, ҳозирги администрация изоляцияга кирмайди», – деганди Трамп. Бу Доналд Трамп президент бўлмаслиги эҳтимолини тилга олган биринчи ҳолат эди.

Амалдаги президент мағлубиятини тан олмаган бўлса-да, Байденни жаҳон давлатлари етакчилари табриклашмоқда ва унинг ўзи ҳам бўлажак маъмурияти учун тайинловларни амалга оширмоқда.

Трамп 1992 йилдан буён иккинчи муддатга сайлана олмаган илк президент бўлди (18 йил муқаддам президент Жорж Буш демократ Билл Клинтонга ютқазганди).