17 декабр куни Россия Мудофаа вазирлигининг йиллик йиғилишида нутқ сўзлаган Владимир Путин Киев ва Европа тинчлик музокараларга киришмаса, куч ишлатиш орқали кўпроқ ҳудудларни эгаллашини айтди.

Путин Россия армияси барча йўналишларда олдинга силжиётганини ва ўз мақсадларига куч билан ёки дипломатия орқали эришишини билдирди.

«Агар қарши томон ва уларнинг хориждаги ҳомийлари мазмунли музокараларга киришишни рад этса, Россия ўзининг тарихий ерларини ҳарбий йўл билан озод қилади», — деди Путин.

Москва талқинига кўра, бартараф қилиниши керак бўлган бир неча «илдиз сабаблар» бор. Euronewsʼнинг ёзишича, улар қаторига Украинанинг Европа Иттифоқи ва НАТОга қўшилиш истаклари, шунингдек, НАТОнинг шарққа кенгаймаслик бўйича мажбуриятларни бузиши, Киевнинг этник русларни гўёки камситиши ва «Украинани денатсификация қилиш» деб атайдиган нарса киради.

Бундан ташқари, Путин АҚШнинг собиқ президенти Жо Байден маъмурияти Россияни йўқ қилишга уринганини, европалик сиёсатчилар ҳам худди шу мақсадни кўзлаганини айтди.

«АҚШнинг аввалги маъмурияти вазиятни онгли равишда қуролли тўқнашувга олиб келган. Назаримда, бунинг сабаби ҳам тушунарли. Ҳамма қисқа вақт ичида Россияни барбод қилиш, парчалаб юбориш мумкин деб ўйлаган. «Европалик чўчқачалар» эса дарҳол АҚШнинг аввалги маъмуриятининг бу ишига қўшилиб, мамлакатимиз қулашидан фойда кўришга умид қилган.

Олдинги тарихий даврларда йўқотилган ниманидир қайтариб олиш ва реванш олишга уринишган. Энди барчага аён бўлдики, Россияга қарши қаратилган бу уринишларнинг барчаси, бу бузғунчи режаларининг барчаси тўлиқ барбод бўлди, мутлақо барбод бўлди», деган Путин.

Нашрга кўра, Путин европаликларни ҳақоратлаш учун қўллаган «подсвинки» (чўчқачалар) атамасини аввалроқ Дмитрий Медведев ҳам Ғарб демократияларини ҳақоратлаш учун ишлатган.