Озарбойжон парламенти Францияни ЕХҲТнинг Минск гуруҳидан чиқариб юбориш масаласида ҳукуматга мурожаат қилди

Озарбойжон Миллий мажлиси Париж билан сиёсий ва иқтисодий муносабатларни қайта кўриб чиқишга чақирган.

Фото: Anadolu Agency

Озарбойжон парламенти (Миллий мажлис) мамлакат ҳукуматини Францияни ЕХҲТнинг Минск гуруҳидан чиқариб юбориш учун ушбу ташкилотга мурожаат қилишга чақирди.

Бу ҳақда Франция Сенатининг Тоғли Қорабоғ мустақиллигини тан олиш тўғрисидаги резолюциясига жавобан эълон қилинган баёнотда айтилмоқда.

Миллий мажлис Франция Сенатининг ушбу резолюциясига нисбатан норозилик билдирган ва Париж билан сиёсий ва иқтисодий муносабатларни қайта кўриб чиқишга чақирган.

Муҳокамалар давомида қатор депутатлар Озарбойжоннинг Париждаги элчисини чақириб олиш ва Франция парламентининг юқори палатаси билан барча муносабатларни тўхтатиш таклифи билан чиқди.

Эслатиб ўтамиз, 26 ноябр куни Франция Сенати Тоғли Қорабоғнинг мустақиллигини тан олиш тўғрисида резолюция қабул қилганди.