SpaceX Халқаро коинот станциясига 3 ҳафта ичида иккинчи фазовий кемасини жўнатди

АҚШнинг SpaceX компанияси Халқаро коинот станциясига Cargo Dragon юк кемасини жўнатди. Кема ХКСга 2 тоннадан кўпроқ озиқ-овқат, тажрибалар ўтказиш учун қурилма ва материаллар етказади.

Фото: Reuters

Кема фазога Falcon 9 ракетаси ёрдамида Флоридадаги космодромдан учирилди.

Бу модификацияланган Cargo Dragon-2 юк кемасининг биринчи парвози бўлди. Ушбу кема ХКСга 20 фоиз кўпроқ юк етказа олади ҳамда коинот станцияси билан манипулятор-қўл ёрдамисиз автоном равишда туташа олади. Ушбу парвоз NASA ва SpaceX ўртасида станция таъминоти бўйича иккинчи шартнома доирасида амалга оширилди.

Кема ХКСга 2 тоннадан кўпроқ озиқ-овқат ҳамда станция экипажи томонидан 250тагача илмий тажриба ўтказиш учун қурилма ва материаллар етказади.

Liftoff! pic.twitter.com/pgk24cph9e
— SpaceX (@SpaceX) December 6, 2020

Айни вақтда Cargo Dragon ХКСдан юкларни Ерга қайтара оладиган ягона фазовий кема ҳисобланади.

Кеманинг ХКСга туташуви 7 декабрга белгиланган. Эътиборлиси, биринчи марта бир вақтда ХКСга АҚШнинг иккита фазовий кемаси туташган бўлади.

Кема станция таркибида бир ойга яқин қолади. Сўнгра у орбитадан чиқарилади ва унинг капсуласи Атлантика океанида қўндирилади. Кема ХКС экипажи томонидан орбитада ўтказиладиган тажрибалар натижаларини Ерга етказади.

Айни вақтда ХКСда “Роскосмос” фазогирлари Сергей Рижиков ва Сергей Куд-Сверчков, NASA астронавтлари Кэтлин Рубинс, Майкл Хопкинс, Виктор Гловер ва Шеннон Уокер ҳамда Япония аэрокоинот тадқиқотлари агентлиги астронавти Соичи Ногучи фаолият олиб бормоқда.

16 ноябрда SpaceX бортида 4 астронавт бўлган Crew Dragon-1 юк кемасини Халқаро коинот станциясига учирганди.