Ўзбекистон элчиси Украина президентига ишонч ёрлиғи топширди

Ўзбекистоннинг янги тайинланган фавқулодда ва мухтор элчиси Алишер Қурмонов 11 декабр куни Мариинский саройида Украина президенти Владимир Зеленскийга ишонч ёрлиғи топширди, деб хабар бермоқда «Дунё».

Фото: Dunyo

Эпидемиологик вазиятни ҳисобга олган ҳолда, маросим ишонч ёрлиқларини топшириш ва Украина президентининг нутқи билан чегараланди.

Украина раҳбари ўз сўзида Ўзбекистон Украинанинг Марказий Осиёдаги муҳим шериги экани, томонлар ўзаро савдо-иқтисодий алоқаларни ривожлантириш ва товар айланмасини 1 миллиард долларга етказишга интилаётганини таъкидлади.

Эслатиб ўтамиз, жорий йил июн ойида Алишер Қурмонов Ўзбекистоннинг Украинадаги элчиси этиб тайинланганди.

А. Қурмонов аввал Ўзбекистон Республикаси Олий Мажлиси Сенатининг Халқаро муносабатлар, ташқи иқтисодий алоқалар, хорижий инвестициялар ва туризм масалалари қўмитаси раиси лавозимида ишлаган.

Шунингдек, у Ўзбекистоннинг Буюк Британия ва Шимолий Ирландия Бирлашган Қироллигидаги фавқулодда ва мухтор элчиси лавозимида фаолият юритган.

Тайёрлаган: Отабек Матназаров

#Украина #Алишер Қурмонов