ЖССТ Европада 2021 йил бошида коронавируснинг янги тўлқини юз бериши мумкинлигидан огоҳлантирди

ЖССТ жамоатчиликни бефарқ бўлмасликка ва байрамлар арафасида қўшимча хавфсизлик чораларини кўришга чақирмоқда.

Фото: Reuters

Жаҳон соғлиқни сақлаш ташкилоти рождество ва янги йил байрамлари нишонланиши сабабли 2021 йил бошида Европада коронавируснинг янги тўлқини юз бериши эҳтимоли юқори эканлигини маълум қилди.

"2021 йилнинг дастлабки ҳафталари ва ойларида коронавирус тарқалишининг юқори хавфи мавжуд ва бунинг олдини олишни истасак, биргаликда ишлашимиз зарур", - дейилади ЖССТнинг Европадаги бўлинмаси баёнотида.

Таъкидланишича, Европа ҳудудида коронавируснинг кенг миқёсда тарқалиши давом этмоқда.

ЖССТ жамоатчиликни бефарқ бўлмасликка ва байрамлар арафасида қўшимча хавфсизлик чораларини кўришга чақирмоқда. Экспертлар рождество ва янги йилни кўчада нишонлашни, байрам иштирокчиларига эса ниқоб тақиш ҳамда ижтимоий масофа сақлашни маслаҳат берган.

Бино ичида байрам нишонлашда эса меҳмонлар сони чекланиши кераклиги тавсия қилинмоқда.

Тайёрлаган Дилшод Аскаров

#Европа #ЖССТ #коронавирус

2019 йилнинг декабрь ойи охирида Хитойнинг Ухань шаҳрида номаълум вирус тарқала бошлади. Бу вирус ҳаво орқали одамдан одамга юқади ва ўлимга олиб келади.