ЖССТнинг Европадаги бюроси директори Ҳанс Клюгенинг фикрича, профилактика, локдаун ва вирус устидан назорат фаол қўлланилсагина у пасайиши мумкин.
Жаҳон соғлиқни сақлаш ташкилоти коронавирус пандемияси ривожланиши борасидаги тахминларда эҳтиёткор бўлишга уринмоқда, аммо дунё йўлнинг ярмига етиб келди деб ҳисоблайди. ЖССТнинг Европадаги бюроси директори Ҳанс Клюге ана шундай фикр билдирди.
"Бунга ўхшаш вируслар тахминан икки йил ривожланади, шунинг учун биз ҳозирча йўлнинг ўртасидамиз", – деди у.
Клюгенинг қўшимча қилишича, ЖССТ коронавирус билан боғлиқ вазият қандай ривожланишини тахмин қилиши қийин, чунки буни олдиндан айтиб бўлмайди.
"Профилактика, локдаун ва вирус устидан назорат фаол қўлланилсагина у пасайиши мумкин. Озгина бўшашсак – яна касаллар сони жадал ўсишини кўрамиз", – деди у.
Охирги маълумотларга кўра, дунё бўйича коронавирус юқтирганлар сони 79,8 миллиондан ошган, 1 млн 752 мингга яқин инсон вафот этган.
