Францияда кучли бўрон оқибатида 30 мингдан ортиқ уй электрсиз қолди

Бретан, Нормандия ва О-де-Франс регионларида соатига 136 километр тезликда эсган шамол дарахтларни илдизи билан қўпориб ташлаган.

Фото: AFP

Буюк Британия ва Францияда юз берган "Белла" бўрони оқибатида Франциянинг марказий ва шарқий регионларида 34 мингга яқин уй электр таъминотисиз қолди.

Хусусан, Оверн-Рона-Алп, Бургон-Франш-Конте ва Элзас провинцияларида энергия таъминоти издан чиқди, деб хабар бермоқда AFP агентлиги.

Мамлакатнинг айрим ҳудудларида кучли қор ёғмоқда.

Аввалроқ об-ҳаво шароити ёмонлашиши сабабли Бретан, Нормандия ва О-де-Франс регионларидаги 18 мингта уй электрсиз қолганди.

RFI онлайн-нашрининг ёзишича, ушбу ҳудудларда дарахтларни илдизи билан қўпориб ташлаган шамолнинг тезлиги соатига 136 километрга етган.