Газли газни қайта ишлаш заводи очилди: аҳолига табиий ва суюлтирилган газ етказиб беришда ўзгариш бўладими?

Заводнинг очилиш маросимида «Ўзбекнефтгаз» акциядорлик жамияти бошқаруви раиси Меҳриддин Абдуллаев, Бухоро вилояти ҳокими вазифасини бажарувчи Ботир Зарипов сўзга чиқди. Мазкур заводнинг ишга туширилиши соҳа ривожи, қолаверса, халқимизнинг табиий газ ва газдан олинадиган маҳсулотларга бўлган талабини қондиришда муҳим аҳамият касб этиши маълум қилинди.

«Жорий йилда тўртта лойиҳани ишга туширишни режалаштирган эдик. Мана, бугун тўртинчи лойиҳанинг амалга ошганига гувоҳ бўлиб турибмиз. Шунингдек, GTL заводининг ҳам қурилиш ишлари якунланиш арафасида.

Шу ўринда 2021 йилда «Ўзбекнефтгаз»нинг олдида турган энг муҳим вазифаларга тўхталмоқчиман. Хусусан, газ қазиб чиқаришни кўпайтириш ва аҳолига узлуксиз етказиб беришни мақсад қилганмиз. Суюлтирилган газнинг ҳажмини ошириб, табиий газ етиб бормаётган ҳудудларга етказиб бериш масаласи турибди. Бу бўйича давлат раҳбарининг бир қатор топшириқларини олганмиз. Келаётган йилда жуда катта вазифаларни ўзимиз учун белгилаб олдик.

«Ўзбекнефтгаз» раҳбари сифатида ватандошларимизга айтмоқчиманки, бизнинг захираларимиз етарли. Худо хоҳласа, биз газни қазиб олиш, ишлаб чиқариш ва қайта ишлаш бўйича катта топшириқлар олганмиз. Халқимиз олдида юзимиз ёруғ бўлиши учун тизим билан биргаликда ишлаймиз, деган умиддаман ва раҳбар сифатида ўз масъулиятимни сезиб турибман», – деди Меҳриддин Абдуллаев.

«Ўзбекнефтгаз» раҳбари умуман, Газли газни қайта ишлаш заводининг ишга туширилиши натижасида 80 минг тоннадан ортиқ суюлтирилган газ олинишини маълум қилди. Бу Қорақалпоғистон Республикаси, Хоразм ва Бухоро вилоятларини қўшимча тарзда суюлтирилган газ билан таъминлаш имкониятини беради. Бундан ташқари, аҳолига берилаётган табиий газ таркибидан олтингугурт ажратиб олинади ва унинг сифатига ижобий таъсир қилади.

Шу ўринда тарихга назар ташласак, Газли ҳудудида йирик газ кони ўтган асрнинг эллигинчи йилларида очилган бўлиб, дастлабки газ захираси деярли 500 млрд куб метрни ташкил қилган. 1962 йилда конни ўзлаштириш бошланиб, табиий газ Бухоро-Урал газ қувури орқали Россияга жўнатилган.

Ҳозирги вақтда Газли минтақасининг мавжуд газ захираси 182 млрд куб метрни ташкил қилади. 2017-2020 йиллар давомида ушбу ҳудудда олиб борилган геология қидирув ишлари натижасида 8 та янги газ конденсати конлари очилди (Тўмарис, Жанубий Кулбешкак, Андакли, Шорқум, Шортак, Шарқий Хатар, Ўртақум, Жанубий Оққум).

2020 йилда табиий газ қазиб чиқариш 33,6 млрд куб метрни, газ конденсати 1 миллион 415 минг тонна, нефт 204 минг тоннани ташкил этиши кутилмоқда. Бунинг учун 121 та янги қудуқ бурғиланди ва ишга туширилди, 600 та қудуқ мукаммал ва жорий таъмирланди, 42 та технологик объект қурилди.

Маълум бўлишича, «Ўзбекнефтгаз» АЖ томонидан келгуси йилда ҳам углеводород қазиб чиқариш кўрсаткичларини ошириш бўйича иш олиб борилмоқда. 2021 йилда табиий газ қазиб чиқариш ҳажми 33,9 млрд куб метрни ташкил этиши кутиляпти.

Газли «уйғонди». Соҳадан нафақага чиққан фахрийларнинг таъбирича, бу ҳудудда очилган, топилаётган кон ва қудуқлар халқимизнинг яхши кунларига, фаровонлигига хизмат қилади.

Журналист Исомиддин Пўлатов