Қишки трансферлар дарчаси очилиши арафасида футбол оламида яна янгидан янги трансферлар ҳақида миш-мишлар ва ҳақиқатга яқин маълумотлар тарқала бошлади. Қуйида сўнгги кунларда энг кўп тарқалган трансфер янгиликлари келтирилади.
Почеттино Леони Парижда кўрмоқчи
«Пари Сен-Жермен» ҳали янги бош мураббийни таништирмади, аммо Тухелнинг ўрнини Маурисио Почеттино эгаллаши кундек равшан.
Le Parisien маълумотига кўра, «Тоттенҳем»дан кетгач ишсиз юрган аргентиналик мутахассис «ПСЖ» раҳбариятига ўз талабларини қўйган — у жамоада «Барселона» ҳужумчиси, ватандоши Лионел Мессини кўришни истамоқда. Манба маълумотига кўра, бу шарт бажарилмаса, аргентиналик мутахассис парижликлар таклифини рад этмоқчи.
33 ёшли Мессининг каталонияликлар билан шартномаси 2021 йил ёзида тугайди, агар клуб у билан яқин вақтлар ичида шартномани янгиламаса, ёзда уни эркин агент сифатида қўйиб юборишига тўғри келади. Transfermarkt унинг трансфер нархини 100 миллион еврога баҳолаган.
Месси клубдан кетиши ҳақида ёзда ҳам хабарлар тарқалганди, у шу кунларда La Sexta учун берган интервьюсида мавсум охирига қадар ҳеч қаерга кетмаслигини маълум қилди.
«Мен «Барселона»ни севаман. «Барселона» - менинг ҳаётим, бу менга барчасини берган клуб. Мен ҳозирда қийин даврни бошдан кечираётганимизни, аввалги даражага қайтишимиз қийинлигини тушунаман. Мавсум якунигача бошқа бирор клуб билан музокара олиб бормайман. Мавсум сўнгини кутаман ва кейин қарор қабул қиламан», деган у.
Шу билан бирга, у ўзи ҳеч қачон ўтмайдиган клубларни маълум қилган. «Мен албатта, «Реал» ёки «Атлетико»га ўтмайман. Бу иложсиз. «Барселона»ни тарк этаманми ёки йўқми, билмайман. Бу ҳақда мавсум охирида гаплашамиз. Аммо фаолиятимни якунлагандан кейин клубда қоламан, деган умиддаман», деган Месси.
Ўтган ҳафтада Месси «Барселона» либосидаги 844-голини урди ва бир клуб сафида урилган голлар сони бўйича Пелени ортда қолдирди. Аммо «Сантос»дагилар Месси ҳеч қандай рекорд ўрнатмаганини айтишмоқда: Пеле бразиллар клубида 1091 гол урган, аммо унинг статистикасига ўртоқлик учрашувларида урилган 448 гол киритилмаган.
Месси жорий мавсумда кўк-анорранглилар клуби сафида 18 ўйин ўтказиб, 10 гол урди ва 5 голга узатма берди.
Эриксен қаерга ўтади?
«Интер» Кристиан Эриксенни сотиб олганига бир йил тўлмасидан уни трансферга қўйди. «Эриксен январда жамоани тарк этади, у бизнинг режаларимизга кирмайди», деган «Интер» клуби бош директори Жузеппе Маротта.
Даниялик футболчи шу йилнинг январида «Тоттенҳэм»дан Италияга келган, лондонликларнинг янги бош мураббийи Жозе Моуриньо ҳам уни режаларига киритмаганди. Ўшанда футболчининг трансфери учун миланликлар 27 миллион евро сарфлашган. Эриксен Конте жамоасида ҳам асосий таркибга кира олмади - жорий мавсумда 28 ёшли футболчи А Сериянинг атиги 8 ўйинида майдонда пайдо бўлган.
Иқтидорли футболчига «Милан», «Бавария», «Арсенал» ва «Манчестер Юнайтед» клублари қизиқиш билдираётгани ҳақида хабарлар чиқиб турибди.
Сўнгги хабарларга кўра, даниялик футболчи Парижда собиқ устози Маурисио Почеттино билан яна бирга ишлаши мумкин. Tuttomercatoweb хабарига кўра, трансфер доирасида Леандро Паредес «Интер»га ўтиши мумкин.
The Sun нашрининг ёзишича, «Тоттенҳэм» яримҳимоячиси Деле Алли ҳам «ПСЖ»га келиши мумкин. Почеттино айни вақтда 24 ёшда бўлган англиялик футболчи билан яхши таниш, унинг плюслари ва минусларидан хабардор. Жозе Моуриньо бошқаруви даврида Алли мураббий билан муносабатларини ёмонлаштириб, захира ўриндиғида қолиб кетди. Бу эса ушбу трансфер амалга ошиши ҳақиқатга яқин эканини англатади.
«Тоттенҳэм»нинг яна бир футболчиси Серж Орье ҳам Парижга қайтиши мумкин. «Қайтишдан хурсанд бўлган бўлардим. Мен Париж клубидан таклифни ҳеч қачон қайтармайман. «ПСЖ» - менинг севимли клубим», деган у Actu Foot нашрига. Орье Париж клубидаги икки йиллик фаолиятидан кейин 2017 йилда 15 миллион евро эвазига «Тоттенҳэм» футболчисига айланганди.
Тухел кетиши ҳақидаги хабарлардан олдинроқ Париж клуби «Челси»дан 27 ёшли Антони Рюдигерни сотиб олмоқчилиги ҳақида хабарлар тарқалганди. Конте даврида клубга таклиф этилган ушбу футболчи Лэмпард даврида клубининг асосий таркибидан тушиб қолган.
«Тоттенҳэм»га ким боради?
Бундеслиганинг энг яхши футболчиларидан бири бўлиб турган, бир неча мавсумдан буён «Лейпциг» сафида барқарор ўйин кўрсатиб келаётган Марсел Забитцер ўз кучини бошқа лигаларда ҳам синаб кўриши мумкин. Айни вақтда 27 ёшли австрияликка «Тоттенҳэм» қизиқиш билдирмоқда. Bild нашри хабарига кўра, Жозе Моуриньо ушбу ҳавбекнинг ўйинларига шахсан қизиқиш билдирган ва Забитцер ҳам Лондонга кўчиб ўтишга қарши эмас.
Футболчи ҳозирги клубида йилига 6 миллион евро миқдорида маош олади, «Лейпциг» эса унинг маоши миқдорини кўтариши даргумон. «Тоттенҳэм» баҳордаёқ ушбу футболчи трансферини амалга ошириш ҳақида ўйлашни бошлаган - унинг ЕЧЛдаги ўйинлари жамоа бош мураббийида катта таассурот қолдирган.
«Реал» Пепе учун курашга қўшилди
«Гремио» вингери Пепе топ-клубда пайдо бўлиши мумкин. SporTV нашрининг ёзишича, «Реал» ушбу 23 ёшли футболчини кузатмоқда ва унинг трансфери учун 20 миллион евро тўлашга тайёр - «Гремио» трансфер учун айнан шунча маблағ сўрамоқда.
Шу билан бирга, бразиллар клуби Пепе бўйича ҳеч қандай таклиф келиб тушмаганини таъкидламоқда. Аввалроқ ушбу бразилияликка «Зенит», «Севилья» ва «Порту» клубларидан ҳам қизиқиш мавжудлиги ҳақида хабарлар тарқалганди. «Рома»эса молиявий жиҳати туфайли рақобатдан чиққан.
Жорий мавсумда 12 гол уриб, 8 голга узатма берган футболчининг ўзи ҳам Европага йўл олишни кўзламоқда. Пепенинг агенти Адриано Спадото ҳозирда руслар клуби билан илк маслаҳатлашувлар бўлиб ўтгани, лекин расмий томондан ҳеч гап йўқлигини айтган.
«Зенит» яна бир бразил учун 40 миллион евро тайёрламоқда
«Зенит»ни Малкомнинг трансфери муваффақиятсиз чиққани учун тез-тез танқид қилиб туришади. Fichajes.net маълумотига кўра, питерликлар клуби шунга ўхшаш яна бир трансферга тайёргарлик кўришмоқда. Бу сафар гап «Эвертон»нинг 23 ёшли форварди Ришарлисон ҳақида кетмоқда - клуб ушбу футболчини сотиб олиш учун 40 миллион евро сарфлашга тайёр. Transfermarkt.de портали футболчининг трансфер қийматини 60 миллион еврога баҳолаган.
Хабарларга кўра, «Зенит» Бразилия терма жамоасига номзод бўлган футболчи учун йилига 10 миллион евродан маош тўлашни назарда тутувчи 5 йиллик шартнома таклиф қилмоқчи. Ришарлисон - Малкомнинг яқин дўсти бўлиб, бу ҳам трансфер амалга ошишига ҳисса қўшишига умид билдирилмоқда.
Ришарлисон 2018 йилда «Уотфорд»дан 39 миллион евро эвазига «Эвертон»га ўтганди. Жорий мавсумда у Англия чемпионатида 11 ўйинда майдонга тушиб, 2 гол урди ва 3 голга узатма берди.
Марсело «Реал» билан хайрлашадими?
Мадриднинг «Реал» клуби фахрийларидан бири Марсело қишки трансферлар ойнаси вақтида клубни тарк этиши мумкин.
El Chiringuito манбаси маълумотига кўра, 32 ёшли бразилиялик Испания чемпионатининг 11-турида «Алавес»га қарши кечган ва 1:2 ҳисобидаги мағлубият билан якунланган ўйиндан кейин жамоадоши Рафаэл Варан билан уришиб қолган. Бундан ташқари, футболчи бош мураббий Зинедин Зиданнинг ишончини йўқотган, у чап қанот ҳимоясида Ферлан Мендини ўйнатишни маъқул кўрмоқда. Шу туфайли Марсело кетиш ҳақида ўйлай бошлаган.
Январ ойида бразилиялик футболчи «Реал»га келганига 14 йил тўлади. Унинг мадридликлар клуби билан амалдаги шартномаси муддати 2022 йил июнида тугайди.
Исконинг ўрнига «Реал»га Фоден келадими?
Шу кунларда «Реал»да бесаранжомлик ҳукм сурмоқда. Diario Gol маълумотига кўра, Иско ўзини трансферга қўйишларини сўраган. Бунинг сабаби у жамоа сардори Серхио Рамос билан зиддиятга борган, сардор уни машғулотлар вақтида ишга тўғри ёндашмасликда айблаган. Жамоанинг бошқа вакиллари ҳам Иско ўзини бундай тутаётганидан норози бўлишган. Ўз навбатида, Иско Испания терма жамоасидан чақирув олиш учун кўпроқ ўйин амалиётига эга бўлиши керак деб ҳисобламоқда ва раҳбариятдан ўзини трансферга қўйишларини сўраган.
Исконинг ўрнига «Реал»га англиялик 20 ёшли Фил Фоден келиши мумкин. Mirror нашри маълумотига кўра, мадридликлар клуби футболчини анча вақтдан буён кузатиб келмоқда ва уни 2021 йилда трансфер қилишни мўлжаллаган. Мадриддагилар ушбу яримҳимоячи «Сити»да етарли ўйин амалиётига эга бўлмаётганидан фойдаланиб қолишмоқчи. Октябр ойидан буён Фоден Англия чемпионати ўйинларида бирор марта ҳам бошланғич таркибдан жой олмади. Transfermarkt.de футболчининг трансфер қийматини 60 миллион еврога баҳолаган.
«Арсенал» Брандтни сотиб олмоқчи
«Арсенал» дербида «Челси» устидан ғалаба қозонди, ўйиндан олдин эса жамоа мухлислари учун ёқимли хабар тарқалганди: Дортмунднинг «Боруссия» клуби яримҳимоячиси Юлиан Брандт «Арсенал»га ўтиши кутилмоқда.
Нуфузли The Athletic нашри тарқатган хабарга кўра, «канонирлар» Доминик Собослаи билан узоқ вақт мобайнида музокара олиб боришган, аммо венгриялик ёш юлдуз «Зальцбург»дан «Лейпциг»га ўтишга қарор қилгач, Лондон клуби раҳбарияти Брандт номзодига юзланган. Хабар қилинишича, Лондон клуби 24 ёшли футболчини қишки трансферлар дарчасидаёқ сотиб олишга ҳаракат қилади.
Алаба Мюнхендан кетади
Давид Алабанинг «Бавария»дан кетиши, афтидан, аниқ бўлган. Мюнхенликлар клуби 28 ёшли ҳимоячиси билан шартномани узайтирмоқчи бўлди, аммо австриялик футболчи кетишга қарор қилди. «Бавария» билан шартнома муддати 30 июнда тугайди, шундай экан, январдан Алаба бошқа клублар билан очиқ музокараларни бошлаши мумкин.
Ҳозирда бу универсал футболчи учун навбат ҳосил бўлмоқда. Bild журналисти Кристиан Фальк Twitter орқали Алабанинг агенти Пини Заҳави ҳозирча «Манчестер Юнайтед» ва «Манчестер Сити» билан музокараларга киришмагани, аммо январда томонлар ўртасида учрашувлар бўлиб ўтиши ҳақида ёзди. Бундан ташқари, Алаба ва Заҳави «Реал», «Барселона» ва «Челси» клубларидан ҳам таклифлар кутмоқда. Катта эҳтимол билан, австриялик январдаги трансферлар доирасида бошқа клубга бориб қўшилади.
«Челси» Ҳоландни сотиб олмоқчи
Норвегиялик ҳужумчи Эрлинг Ҳоланд ўтган қишдаёқ «Челси» аъзосига айланиши мумкин эди — Лондон клуби «Зальцбург» билан музокаралар олиб борган, аммо вундеркинд Дортмунднинг «Боруссия» клубини танлаганди (The Telegraph нашри ёзишича, Ҳоланд ўз фаолиятини босқичма-босқич ривожлантиришни афзал кўрган).
Бу қишда «Челси» ушбу 20 ёшли форвардни сафига қўшиб олиш учун яна бир бор уриниб кўради. Sky Sport Italia нашрининг ёзишича, Ҳоланд — кўклар клубининг яқин келажак учун асосий нишони. Хабар қилинишича, «Челси» «Боруссия» билан барча масалани январда ҳал қилиб қўймоқчи, футболчи трансфери ёзда амалга оширилиши мумкин. Клублар бу схемадан икки йил муқаддам фойдаланишган, ўшанда Лондонга Дортмунддан америкалик яримҳимоячи Кристиан Пулишич йўл олганди.
«МЮ» учун янги ҳимоячи?
«Қизил иблислар» мудофаани кучайтириш учун футболчи излашда давом этмоқда. Daily Mail нашри «Манчестер Юнайтед» таркибга таклиф этмоқчи бўлаётганлар орасида «Шальке»нинг 20 ёшли марказий ҳимоячиси Озан Кабакни алоҳида ажратиб кўрсатди. Туркиялик бу футболчи аввал ҳам премьер-лига клублари назарига тушганди: ёзда «Шальке» ўз футболчиси учун «Ливерпул»дан 44 млн евро сўраганди. Нашрнинг қайд этишича, коронавирус пандемияси таъсири туфайли «Шальке» Кабак учун нархни туширишга тайёр ва уни «МЮ»га 27,5 миллион еврога сотиши мумкин.
