Семенё – қишки трансферлардаги асосий актив. У қайси клубга ўтади?

Ўз навбатида, Семенё учун ҳам қулай келишув – гўёки каттароқ маош, янги шартнома, аммо эркинлик унинг ўзида қолади. Шунинг учун томонлар товон пули белгилашга қарор қилишади – унинг трансфер нархи 2026 йил 1 январидан 65 миллион фунт бўлади, ёзга бориб эса 60 миллион фунтга тушади.

Ўтган ёзда клублар жуда фаол бўлишди ва кўплаб юлдуз футболчилар клубларини ўзгартиришди – Мадуэке, Эзе, Куня, Мбеумо, Қуддус каби футболчилар айнан Семенё даражасидаги футболчилар. Айтиш мумкинки, уларнинг ҳар бири ҳозирча ишончни оқламоқда, яъни АПЛ доирасида кичик клубдан катта клубга ўтиш деярли кафолат даражасига чиқди. Семенёнинг товон пули мана шу трансферлар нархига нисбатан катта эмас, деярли минимал сумма. Табиийки, узоқ давом этадиган музокаралар, футболчини қўлга киритиш учун рақобат ҳар бир топ-клубни тезроқ ҳаракат қилишга ундамоқда. Қисқасини айтганда, айни дамда Семенё витринада турган жавоҳир – муайян суммани тўлайсиз ва у сизники.

Шу билан бирга, 5 миллион фунтлик чегирма фақат 10 январгача амал қилади. Агар шу муддат ичида келишув амалга ошмаса, «Борнмут» футболчисини ёзгача ўз сафида сақлаб қолиши мумкин. Бу ҳам қайсидир маънода харидорларни шошилишга ундамоқда. Бу трансфер ҳақида хабарлар нисбатан анча эрта бошлагани ва балки қишки ойнанинг илк катта харидларидан бири бўлиши мумкинлигининг сабаби шу.

Яна бир жиҳат, айни пайт Семенёни клубни алмаштиришга кўндириш учун осонроқ палла экани. «Борнмут» мавсумни жуда яхши бошлади ва бир муддат етакчилар қаторида кетаётганди. Лекин кейинчалик пасайиш кузатилди ва ҳозирда Ираола шогирдлари жадвалнинг иккинчи ярмига тушиб кетишди. Яъни клуб ҳам, футболчи ҳам иккинчи даврада курашиш учун жиддий мотивация қолмаганидан, трансферга қарши бўлмаслиги мумкин. Нархни ошириш, вариантларни кўпайтириш учун ёзни кутишдан маъно йўқ.

Манчестер клубларига Семенё нима учун керак?

Фабрицио Романонинг айтишича, «Манчестер Сити» ва «Манчестер Юнайтед» футболчи учун жиддий курашга киришган. Аввалига «Ливерпул» ва «Сити» ўртасида кураш кетаётганди, аммо сўнгги кунларда «Юнайтед» ҳам фаоллашди ва имкон қадар тезроқ ҳаракат қилишга уринмоқда. Пеп Гвардиола жамоаси фаворит саналаётган бўлса-да, баъзи манбалар ёзишича, клуб келаси ёздан кейин ҳам Гвардиола жамоада қолиши бўйича ҳеч қандай кафолат бермаган. Пепнинг ўзи ҳам бу масалада анча мавҳум жавоблар бермоқда. «МЮ» эса бундан фойдаланиши ва футболчига аниқроқ лойиҳа таклиф қилиб қолиши эҳтимоли юқори.

«Манчестер Сити»да чап қанотда услубан Семенёга жуда яқин бўлган Доку тўп суради ва ушбу мавсумда у анча ўсди. Клуб Семенёни ёши ўтиб бораётган Бернарду Силва ёки жамоани тарк этадиган Савиниога ўринбосар сифатида кўриши мумкин, аммо ҳар икки ҳолатда ҳам Антуанга асосий таркибдан жой кафолатланмайди. Райан Шерки ва Фил Фоден ҳам сўнгги ойларда анча кучли ўйнаётгани эътиборга олинса, бир вақтнинг ўзида Ҳоланднинг ортида Доку, Фоден, Шерки ва Семенёни тушириш ҳатто Родрининг энг яхши даврлари учун ҳам кўплик қилади. Ҳимояда ҳар икки қанотда аслида яримҳимоячилар ўйнаётганини ҳам унутмаслик керак – бу ҳолатда мувозанат бутунлай бузилиб кетиши мумкин. Ўзи умуман Пеп Гвардиоланинг қишки трансферларга муносабати сир эмас – ўтган қишки ойнада олиб келинган Мармуш ва Ҳусанов деярли майдонга тушмаяпти, Рейс ижарага бериб юборилган, фақат Нико Гонсалесда таркиб учун рақобатчилардаги жароҳат (Родри ва Ковачич) туфайли ўйин амалиёти бўлмоқда.

Шунга яқин ҳолат «Манчестер Юнайтед»да ҳам бор. 3-4-2-1 схемаси учун олдинги учлик шаклланиб бўлган ва янги футболчи учун на Куня, на Мбеумо қурбон қилинади. Инсайдларнинг айтишича, Аморим Семенёдан худди ўнг қанотдаги Амад каби фойдаланмоқчи. Яъни чап қанот латерали сифатида. Айни пайтда Патрик Доргу ҳам, Диогу Далот ҳам етарлича яхши формада эмас. Семенё «Борнмут»даги илк мавсумларида қанот ҳимоясида, 3-4-3 схемасида эса вингбек бўлиб ўйнагани эътиборга олинса, эплаб кетиши мумкин. Қоғозда чапда Куня-Семенё, ўнгда Амад-Мбеумо тандемлари ўта ҳужумкор ва даҳшатли кўриниши мумкин.

«Манчестер Сити»дан фарқли равишда «МЮ»да Семенё дарҳол асосий таркибда туша бошлайди, бу шубҳасиз. Лекин жамоада асосий муаммо ҳужум чизиғи эмас, марказий яримҳимоя экани анчадан бери айтиб келинмоқда. Бу чизиқ тўлдирилмай туриб, майдонга беш нафар ҳужумкор футболчини тушириш, ортда эса Бруно Фернандеш ва Каземиро билан ўйнаш «МЮ»ни фақат бетараф мухлислар учун жозибадор қилади ва 4:4 ҳисоблари янада кўпайиши тайин.

Аммо агар футбол томонидан ўйланса, ҳар икки клубда ҳам Семенёга ошкора эҳтиёж йўқ ва шу томондан, пайдо бўлиб қолган имкониятдан фойдаланиб қолишдек тасаввур уйғотмоқда. Бу омил футболчининг келажаги учун муҳим ва Антуаннинг ўзи бу ҳақда кўпроқ ўйлаши керак.

«Ливерпул»: Семенё янги Салоҳ бўладими?

Мерсисайдликлар Манчестер клубларига нисбатан бироз пассивроқ, Романонинг айтишича, клуб куз бошларида қизиқиш билдирганидан буён жим. Шундоқ ҳам «Ливерпул»да янгилар етарли ва гўёки яна бир йирик харид ортиқчадек. Аммо профил бўйича айнан Семенё Слот жамоаси учун керакли мурват бўлиши ва қайсидир маънода Луис Диашнинг ўрнини босиши мумкин.

Колумбиялик чап қанот вингерининг кетиши, Салоҳ билан муаммолар, Киеза тўлиқ асосийга тайёр эмаслиги ва Нгумоа ҳали ёш эканидан келиб чиқсак, «Ливерпул»да соф вингер деярли йўқ. Коди Гакпо ҳам, баъзида қанотларда ўйнаётган Вирц ва Сабослаи ҳам тўп билан марказга ўтишни, жарима майдони атрофида тўпни қабул қилишни яхши кўришади. Майдон энини кенгайтирадиган ҳақиқий тезкор вингерларсиз бу вазифа асосан қанот ҳимоячиларига юкланмоқда. Бу ҳам нормал, лекин муаммоли жамоада аксинча, ҳужумчилар ҳимояга ёрдам бериши муҳимроқ саналади. Антуан Семенё қарши ҳужумларда тезкор ҳаракат қилиши, дриблинги ва ҳимояда ҳам фаол бўла олиши ҳисобига «Ливерпул»нинг чап қаноти учун айни муддао бўлади.

Муҳаммад Салоҳ жамоани тарк этиши эҳтимоли юқори, бу қишдаёқ содир бўлиши ҳам мумкин. У ҳолда тезкор ҳужумлар маркази чап томонга кўчиш варианти пайдо бўлади. Умуман, аслида Семенё бемалол Салоҳ билан тандемда ҳам ўйнай олади, ўз вақтида Мане-Салоҳ жуфтлиги билан жамоа барча совринларни ютганини эслаш мумкин. Ганалик футболчи кўп томони билан айнан Садио Манени ҳам ёдга солиб юборади.

Қолаверса, ўтган турда «Тоттенҳэм»га қарши ўйинда Александр Исак жиддий жароҳат олди ва камида икки ой муддатга сафдан чиқди. Guardian маълумотига кўра, шундан кейин клуб қишда бозорга киришга қарор қилган.

Семенёга «Тоттенҳэм» қизиқаётгани ҳақида ҳам хабарлар бор, унинг ўзи эса болалигидан «Арсенал» мухлиси ҳисобланади. Лекин Лондон вариантлари ҳақиқатдан анча узоқ бўлса керак. «Тоттенҳэм» ёмон мавсум ўтказмоқда ва Томас Франк истеъфо ёқасига келиб қолди. Клуб раҳбарлари ҳали давом этиши аниқ бўлмаган мураббий учун катта трансферлар қилмаса керак. Семенё учун курашда рақиблар кўпайгач, клуб яна Савинио вариантига қайтгани ҳақида маълумотлар чиқди. «Арсенал» эса таркибини ёзда етарлича тўлдириб бўлган, бунинг устига Жезус ва Ҳаверц каби ҳужум вакиллари ҳам жароҳатдан қайтишмоқда. Олдинги чизиққа қўшимча яна бир футболчи ортиқча бўлиши мумкин.

Бу кетишда Антуан Семенё январнинг илк кунларидаёқ жамоасини алмаштириши эҳтимоли юқори. Юқоридаги мулоҳазалардан келиб чиқсак, футболчи учун энг мос йўналиш – Ливерпул бўларди, аммо Манчестер клублари фаолроқ ҳаракат қилаётгани эътиборга олинса, Антуан шу икки жамоадан бирини танлашига тўғри келади. Футболчи келаси йили 26 ёшга киради, бу топ-клубга ўтиш учун унда сўнгги имконият бўлиши ҳам мумкин.

Қ.Асланов