Қишдаги асосий трансферлар: «Сити» яна фаол, Эндрик «бахти»ни топди, Саудияда можаролар

Европада қишки трансферлар ойнаси ҳам ёпилди ва қатор жамоалар мавсумнинг иккинчи ярми олдидан таркибларини кучайтириб олишди. Одатдаганидан анча сокин кечган бўлса-да, аслида анча эътиборга арзирли келишувлар ҳам бўлди. Қуйида қишки трансферлардаги энг қиммат 10 харид ҳақида фикр юритилади.

Лоренцо Лукка («Удинезе»дан «Наполи»га) – 26 миллион евро

Футболчини ушбу трансфер ойнасида «Наполи» сотиб олган бўлса-да, у янги клубини тарк этиб, «Ноттингҳэм Форест»га йўл олади. Гап шундаки, аслида Италия клуби ҳужумчини ўтган ёзда «Удинезе»дан ижарага олганди. Ромелу Лукакунинг жароҳати клубни турли вариантларни излашга ундаган ва Ҳойлунд билан бирга Лукка ҳам олиб келинганди. Аммо 25 ёшли ҳужумчи «Наполи»да кўп ўйнамади, Антони Конте кўпроқ Расмусга ишонч билдирди. Лукка эса биринчи даврада атиги 4 ўйинда бошланғич таркибдан ўрин олди. Ромелу Лукаку жароҳатидан тузалиши эса Луккага бўлган эҳтиёжни янада камайтириб юборди.

Аммо аввалги мавсумларда «Удинезе» таркибида сермаҳсуллик кўрсатган, Италия миллий жамоасига ҳам жалб қилинаётган ҳужумчидан бутунлай воз кечилмади. «Наполи» унинг трансфер ҳуқуқини «Удинезе»дан сотиб олиб, «Ноттингҳэм Форест»га ижарага берди.

Буни анча оқилона юриш дейиш мумкин. Биринчидан, агар футболчин Англияда ўзини кўрсатса, уни каттароқ нархга сотиш имконини беради. Иккинчидан, мабодо Лукка ёзда Англиядан қайтиб келган тақдирда ҳам, клубда Ҳойлунднинг трансфер ҳуқуқини сотиб олишга зарурат бўлмайди. Учинчидан, «Ноттингҳэм»даги эҳтимолий муваффақиятли ўйинлар Лукка Италия миллий жамоаси таркибида мундиалга боришига йўл очиши мумкин. «Наполи» захирасида эса унда бундай имконият бўлиши даргумон. Айтиш мумкинки, жаҳон чемпионати – ҳар қандай футболчининг нархини ошириш учун айни муддао. 26 миллион евро Италия клублари учун катта сумма ҳисобланса-да, якунда «Наполи» бу трансфердан ижобий фарқ билан чиқиши ҳам мумкин.

Муҳаммад Қодир Мейте («Ренн»дан «Ал Ҳилол»га) – 30 миллион евро

Муҳаммад Қодир Мейте – Криштиану Роналдунинг ғазабига сабаб бўлган трансферлардан бири. «Ан Наср»нинг трансфер бозоридаги сусткашлиги фонида «Ал Ҳилол»нинг бу хариди катта қадам сифатида баҳоланиши мумкин. Бу шунингдек, Саудия клубларининг трансфер бозоридаги янги сиёсатини ҳам ифодалайди – нафақа ёшидаги юлдузларни жалб қилиш ўрнига, ёш ва истиқболли футболчиларни олдинроқ пайқаш ва келажакда Европа клубларига қайта сотиш орқали лиганининг имижини янада ошириш.

Сўнгги йил давомида қатор футболчилар Саудиядан Туркия ва Испанияга қайтишди. Саудияга кетиш – футболчилик фаолиятини якунлаш эмаслигини намойиш қилиш – жуда кўп ёш футболчиларнинг қизиқишини ошириши турган гап. Мейтенинг трансфери мана шу жиҳатдан ҳам жуда аҳамиятли.

Муҳаммад Мейте, 18 ёшли, бўйи 193 см бўлган бақувват ҳужумчи. Футболчига Англиянинг қатор клублари, жумладан «Манчестер Юнайтед» ҳам қизиққани – келишув даражасини оширади. Мейте ўтган мавсумдан бошлаб «Ренн» сафида лига ўйинларида қатнаша бошлаган, бу мавсумда эса Франция чемпионатида асосан захирадан майдонга тушиб, 3 гол ва 2 ассист амалга оширганди. Франциянинг турли ёшдаги жамоаларида ўйнаб чиққан. Футболчининг Трансфермаркет порталидаги нархи 13 миллион евро этиб баҳоланган бўлса ҳам, у ёшлиги, рақобат етарлича бўлгани, Саудия Арабистони «солиғи» билан қўшиб ҳисобланса – анча адекват нарх.

Оскар Бобб («Манчестер Сити»дан «Фулҳэм»га) – 31 миллион евро

«Замонавий футболдаги бир ҳолат мени хафа қилади – ёшлар таркибида яхши футболчилар бўлиб туриб, нега клублар ташқаридан катта суммаларга ҳужумчи сотиб олишади?» – деб ёзғирган экан 2009 йилда Пеп Гвардиола.

Албатта, агар академиядан Месси ёки Педро чиқиб турса, бундай фикрлаш осон, аммо ўз вақтида Оскар Бобб ҳам Манчестернинг бўлажак юлдузи сифатида баҳоланган. Энди эса сўнгги йилларда клубни бирма-бир тарк этаётган тарбияланувчилар сафига қўшилди.

Бошқа томондан олиб қараганда, норвегиялик футболчи аллақачон 22 ёшда, бундан буёғига кескин ўсиш бўлишини кутиш қийин. Тўғри, унинг жамоа таркибида бўлиши, баъзи ўйинларда фойдаланиш учун зарар қилмайди, аммо бугунги молиявий чекловлар даврида академия футболчиси учун 30 миллион евродан кўпроқ маблағ олиш – клубга трансфер бозорида кўпроқ харажатлар қилишга имкон беради.

Оскар Бобб 2023/24 йиллар мавсумида кашфиётлардан бири бўлган, унинг «Нюкасл» дарвозасига сўнгги дақиқаларда урган ғалаба голини кўпчилик яхши эслайди. Аммо у кейинги мавсум бошидаёқ, аниқроғи, Суперкубок учун ўйинда оғир жароҳат олди ва узоқ муддатга сафдан чиқди. Айнан мана шу воқеа футболчининг ривожланиш темпини анча ортга суриб юборди.

«Фулҳэм» эса футболчи учун идеал жой дейиш мумкин. Ёшларга имкон берадиган яхши мураббий, барқарор муҳит, еврокубоклар учун кураш, босим бироз камроқ экани – Боббнинг ўз даражасига қайтиши учун идеал шароит. Айнан «Фулҳэм»да Оскарнинг тақдирдошлари, яъни топ-клубларнинг асосий таркибига илина олмаган бир қатор футболчилар, жумладан, Сессенён, Смит-Роу, Ивоби, Чуквезе, Перрейра, Лено, Траоре каби футболчилар анча муваффақиятли тўп сургани ва сураётганини эслаш кифоя.

Адемола Лукман («Аталанта»дан «Атлетико»га) – 35 миллион евро

Ўтган ёзда испан клублари ичида энг кўп пул сарфлаган «Атлетико» қишда ҳам жим ўтирмади ва ҳужум чизиғини янада кучайтирди. Лукман айнан Симеонебоп футболчи – жисмонан кучли, кўп югуради, Гасперини футболида ҳам йўқолиб қолмагани – у ҳақидаги хулосалар учун етарли. Шу билан бирга, яхшигина дриблингга эга ва тезкор. Кичик ҳудудларда ҳам, қарши ҳужумда ҳам, турли схемаларда ҳам фойдали ҳаракат қила олади. Чап қанотда, ҳужум ортида, ягона ҳужумчи сифатида ҳам тажрибага эга. Симеоне жамоасида Лукман каби футболчилар доим бўлган, масалан, Анхел Корреани тилга олиш мумкин.

Аслида «Атлетико»нинг Лукманга эътибор қаратганининг асосий сабаби – Антуан Гризманнинг спорт формаси пасайгани бўлиши мумкин. Франциялик футболчининг аввалгидек эмаслиги Алваресга бўлган юкламани ҳам ошириб юбормоқда. Лукман эса жамоани жуда яхши тўлдириши мумкин.

Адемола 28 ёшда экани ва бу катта клублардаги охирги шартномаси бўлиши мумкинлигидан келиб чиқсак, 35 миллион евро бироз қиммат кўринади, лекин бошқа тарафдан, Мадриддан қарши рейс билан Жакомо Распадори «Аталанта»га йўл олди. Трансфер нархи худди олти ой олдин «Атлетико» сотиб олганидек – 22 миллион евро. Яъни Лукман учун белгиланган нархга рози бўлиш эвазига аввалги муваффақиятсиз трансфер харажати ҳам қопланмоқда. Бу рокировка ортида яна нималар борлигини билмаймиз. Шу ўринда «Барселона» ва «Ювентус» ўртасида Артур ва Пиянич иштирокидаги рокировкани эслаш мумкин.

Конор Галлаҳер («Атлетико»дан «Тоттенҳэм»га) – 40 миллион евро

«Атлетико» Конор Галлаҳерни ҳам «Тоттенҳэм»га сотди. Икки йил олдин Конор Лондоннинг бошқа клуби – «Челси»дан Мадридга ташриф буюрганида, айнан Симеоне услубидаги футболчи сифатида баҳоланганди. Ҳақиқатан ҳам Галлаҳер ундан кутилган даражани берди, лекин барибир испан футболи Англиядагидан фарқ қилишини ҳам эътиборга олиш керак. «Атлетико» Ла Лига ёки Европа футболи фонида асосан жисмоний футболга асосланган услубдек туюлса-да, барибир тўп назорати, пас бериш маданияти бўйича минимал талаблар АПЛдагига қараганда юқори. Табиийки, бу борада Конор «Атлетико»нинг бошқа яримҳимоячилари Коке ёки Баэна билан рақобатлаша олмайди. Натижада у асосий таркиб футболчиси эмас, айрим тор вазифалар, аниқ баъзи сценарийлар учун ишлатиш мумкин бўлган қуролга айланиб қолди.

Шунда ҳам Конор Галлаҳер Англия, айниқса, «Тоттенҳэм» услуби учун керагидан ҳам яхши футболчи бўла олади. «Тоттенҳэм» статистикага кўра АПЛ жамоалари ичида энг кўп югураётган жамоа бўлса-да, бу натижаларда ижобий аксини бермаяпти. Сабаби эса жамоада темпни бошқариши мумкин бўлган, тажрибали марказий футболчилар етишмаслигидир. Мэддисон, Бергвал каби футболчилар эса жароҳатда. Таркибга Галлаҳернинг қўшилиши – Томас Франк жамоасига етишмаётган муҳим жиҳатларни тақдим этиши мумкин. Ўз навбатида, жаҳон чемпионати олдидан футболчи миллий жамоага қайтиш учун курашиши мумкин. Англия таркибида марказий яримҳимоя учун рақобат жуда кучли бўлса-да, айнан Англияда тўп сурадиган футболчиларга эътибор кўпроқ бўлиши сир эмас.

Бреннан Жонсон («Тоттенҳэм»дан «Кристал Пэлас»га) – 40 миллион евро

Европа клубларидаги трансферлар Дирихле принципини эслатади – кимдир келса, албатта бошқаси жой бўшатиши керак. Жонсон аслида ёмон ўйинчи эмас, ўтган мавсумнинг энг яхшиларидан бири бўлган, барча мусобақаларда 18 голга муаллифлик қилганди. Ўтган мавсумда Европа лигаси финалида «МЮ» дарвозасига ғалаба голини уриб, бу мавсумда лондонликлар жамоаси Чемпионлар Лигасида қатнашишини таъминлаганди. Футболчи атиги 24 ёшда, бемалол бир неча йил фойда келтириши, яна ўсиши мумкин эди.

Аммо бу «Тоттенҳэм» томонидан кўпроқ таркибдаги балансни таъминлашга қаратилган трансфер. Қуддус, Коло Муани, Тел, Симонс каби харидлардан сўнг таркибнинг ҳужум чизиғи учун номзодлар керадиган ортиб кетди. Мэддисон ва Кулушевски ҳам қайтганда, Жонсоннинг асосий таркибга кириш имконияти янада пасайган бўларди. Аслида, футболчининг ўтган мавсумда кўпроқ ўйинларда майдонга тушгани ҳам жароҳатлар билан боғлиқ эди. Бундай шароитда 40 миллион евролик таклиф чиқиши эса клуб учун айни муддао бўлди.

«Кристал Пэлас» учун эса бу трансфер айниқса, сиёсат учун, раҳбарият клуб мухлислари олдида ўзини оқлаши учун керак эди. Ўтган мавсумда Олисе, ёзда Эзе, қишда эса Гейининг кетиши, Адам Уортон учун навбат катталашаётгани, бу сотувлардан эса бош мураббийнинг норозилиги табиийки, «Кристал Пэлас» раҳбарларининг мухлислар қаршисидаги позициясини ёмонлаштирганди.

Лукас Пакета («Вест Ҳэм»дан «Флеменго»га) – 42 миллион евро

Руйхатдаги энг тушунарсиз трансфер. Албатта, Пакетанинг Европадаги етти йиллик фаолиятидан сўнг собиқ жамоасига қайтиши – гўзал ҳикоя, аммо трансфер суммаси Бразилия футболи учун рекорд экани инобатга олинса, картина ўзгаради. Бошқа тарафдан, Лукас Пакета Бразилия миллий жамоасининг асосий таркиб футболчиси экани, Лондондаги жорий мавсум кутилгандек чиқмаган бўлса-да, у ҳали анча фойдали бўла олишини ҳам таъкидлаш керак.

Лукас аслида икки йилча олдин анча баланд нархга, ҳатто 100 миллион еврога яқин суммага ҳам трансфер бўлиши мумкин эди. Пеп Гвардиола уни жуда юқори баҳолаган ва «Манчестер Сити» таклиф ҳам тайёрлаётганди. Аммо 2023 йилда футболчининг букмекерлар билан кирли ишларга алоқадорлиги, хусусан, ставкалар учун баъзи ўйинларида атайлаб сариқ карточкалар олгани бўйича гумонлар юзага чиқди. Айнан мана шу воқеалар унинг трансферини барбод қилган, кейинчалик, футболчининг айтишича, унга руҳий таъсир ўтказиб, спорт формаси тушиб кетишига сабаб бўлган экан. Кейинчалик футболчи оқланди, лекин Лукаснинг фаолиятидаги изни ўчириб бўлмасди.

Йорген Странд Ларсен («Вулверҳэмптон»дан «Кристал Пэлас»га) – 50 миллион евро

Норвегиялик 25 ёшли ҳужумчи аввалги мавсумда анча сермаҳсуллик кўрсатганди. «Вулверҳэмптон» каби аутсайдер таркибида АПЛнинг ўзида 14 гол уриши (барча турнирларда 17) – катта натижа. Аммо бир қатор креатив шериклардан айрилгач, Ларсеннинг кўрсаткичлари ушбу мавсумда анча тушиб кетди – АПЛ да атиги 1 гол.

Албатта, «Кристал Пэлас» футболчини баҳолашда кўпроқ аввалги мавсумга, ҳужумчи яхшироқ шароит ва структурага эга бўлган даврга кўпроқ эътибор қаратгани мантиқан тўғри бўлиши мумкин.

Шундай бўлса-да, барибир тушунарсиз – «Кристал Пэлас» январда Ларсен ва «Астон Вилла» сафида АПЛда бирорта ҳам гол ура олмаган Эванн Гассанни олди. 8 гол урган Жан-Филипп Матетани эса «Милан»га сотишга ҳаракат қилди. Аммо франциялик ҳужумчининг Миландаги тиббий кўриги муваффақиятсиз якунланиб (унда жиддий жароҳат аниқланган), у ҳам камида ёзгача жамоада қоладиган бўлди. Демак, «Кристал Пэлас» ҳужум чизиғида энди Ларсен, Жонсон, Матета, Сарр, Гассан ва Нкетиа бор – бемалол айтиш мумкинки, лиганинг энг хавфли ҳужумларидан бири.

Жереми Жаке («Ренн»дан «Ливерпул»га) – 62 миллион евро

«Ренн»нинг январдаги яна бир катта сотуви, аммо Мейтедан фарқли равишда Жаке ёзгача жамоада қолади. «Ливерпул» футболчи учун рақобат кучайиб кетишидан чўчиб, ҳозирданоқ расмийлаштириб қўйишни лозим топди. Аммо шунда ҳам кўп мутахассислар «Ливерпул»нинг қисқа муддатли ечимларга эга эмаслиги якунда қимматга тушиши мумкинлигидан хавотирда. Гап шундаки, аслида «Ливерпул» ўтган ёзда янги марказий ҳимоячига эҳтиёж сезганди, аммо сўнгги паллада Марк Гейи билан келишув барбод бўлди. Ёзда олиб келинган ёш ҳимоячи Леони эса жиддий жароҳат олиб,клуб мавсумни атиги икки нафар соғ марказий ҳимоячи билан бошлади.

Бу ҳолат қишки трансферлар ойнасида ҳам тузатилмагани – мухлисларнинг норозилигига сабаб бўлмоқда. Ҳар қандай кичик жароҳат ҳам марказда Эндо ёки Гравенберҳни туширишга мажбур қилаётган, жамоа эса ҳали уч мусобақада курашни давом эттираётган бир пайтда фақат келаси мавсум учун трансфер қилиш – бугунги муаммоларни ҳал қилмайди.

Жереми Жаке – 20 ёшли марказий ҳимоячи, жорий мавсумдан «Ренн»нинг асосий ҳимоячиларидан бирига айланди, Франция ёшлар жамоасига ҳам жалб қилинмоқда. Трансфер нархи қимматлиги чўчитмаслиги керак, зеро Франция чемпионатидан келган ҳимоячилар одатда Англияда йўқолиб қолишмайди. Жакенинг қиймати яқинда содир бўлган Лени Йоро ёки Абдуқодир Ҳусановнинг нархига мос келади. Жаке ва Леони «Ливерпул»нинг келажак учун инвестицияси ҳисобланади ва бир неча йилдан сўнг ван Дейк – Конате жуфтлиги ўрнига асосий тандемга айланиши мумкин.

Антуан Семенё («Борнмут»дан «Манчестер Сити»га) – 72 миллион евро

Англия жамоалари ичида қишнинг асосий сериали бўлиши кутилган Антуан Семенё трансферини «Манчестер Сити» нисбатан анча эрта якунлаб қўйди ва 72 миллион евро эвазига ўз сафига қўшиб олди. Шундоғам, Доку, Фоден, Шерки, Мармуш каби ҳужум чизиғи вакиллари бўлган клуб учун қўшимча футболчи нимага керак, деган саволлар кўп янграган бўлса-да, тезда йўқолди. Зеро ҳозирда «Арсенал» билан рақобат қилиш учун битта таркиб етарли бўлмайди.

Семенё «Манчестер Сити»га жуда тез мослашди, беш ўйинда 4 гол ва 2 ассистни амалга ошириб улгурди. Айнан Семенё туфайли Жереми Докунинг жароҳати ҳам, Ҳоланднинг ёмон спорт формасининг ҳам таъсири сал бўлса-да, пасайган бўлиши мумкин. Унинг универсаллиги (у ҳар икки қанотда ҳаракат қила олади), серқирралиги, шунингдек, ёш жиҳатдан айни пайтда оптимал ҳолатда экани – Пеп Гвардиолани кўпроқ қизиқтирган бўлиши мумкин. Гвардиола жамоаларида доим ўйин тизими бирламчи саналса-да, Шерки, Семенё каби индивидиуал футболчилар таркибда бўлиши «Манчестер Сити»ни янада хавфлироқ жамоага айлантиради ва ҳар қандай муваффақиятсиз кечаётган ўйинлар ҳам уларнинг ёрдамида ижобий натижа билан якунланиши мумкин.

Бонус

Юқорида асосий ўлчов сифатида трансфер суммаси эътиборга олинган бўлса, қуйида қиймат бўйича топ-10 га кирмаган, аммо таъсир жиҳатидан балки янада муҳимроқ бўлиши мумкин бўлган яна бешта транферга тўхталамиз.

Карим Бензема («Ал Иттиҳод»дан «Ал Ҳилол»га) – 25 миллион евро

Карим Бензема Саудия Арабистонига қилинган буюк кўчишлардан кейинги даврнинг энг яхши ҳужумчиларидан бири. «Ал Иттиҳод» сафида 87 ўйинда 57 гол ва 18 ассистни амалга оширган. Ўтган мавсумда у 21 гол билан жамоаси мамлакат чемпиони бўлишига ҳисса қўшди.

Бу мавсумда эса «Ал Иттиҳод» чемпионлик учун курашмаяпти ва пешқадамдан 16 очкога ортда бормоқда. Франциялик ҳужумчи эса янги шартнома бўйича келиша олмади ва жамоа ўйинларини бойкот қилди. Шундан кейин унга бошқа жамоа топиб беришди.

Криштиану Роналдунинг ёзғирганича бор – уч йилдан бери чемпионлик учун курашиб, бу сафар энди яқин келаётган бир пайтда PIF (Саудиянинг 4 клубини молиялаштирадиган ташкилот) 25 миллион пулни у чўнтагидан бунисига солиб, «Ал Иттиҳод»нинг энг яхши ҳужумчисини пешқадам «Ал Ҳилол»га олиб берди. Албатта, бундан «Ан Наср»га нисбатан қандайдир фитнани тахмин қилиш ҳам мантиқли кўринади.

Барибир, трансфер содир бўлди, Карим Бензема аллақачон «Ал Ҳилол»да дебют қилиб, уч гол ва бир ассист билан «Ал Аҳдуд» устидан 6:0 ҳисобидаги ғалабага ҳисса қўшди.

Нголо Канте («Ал Иттиҳод»дан «Фенербаҳче»га) – эркин агент

Трансфер ойнасининг сўнгги кунларида Европада кутилган «портлашлар» аслида Арабистон яриморолида содир бўлганининг яна бир исботи. Криштианунинг юқорида тилга олинган исёнидан бекор бўлишга сал қолган яна бир келишув.

Гап шундаки, «Ал Иттиҳод» ва «Фенербаҳче» аллақачон бу трансферни келишиб қўйган, эвазига турк клуби марокашлик ҳужумчи Ан-Носирий ва унга қўшиб 4 миллион еврони «Ал Иттиҳод»га бериши лозим эди. Аммо Бенземанинг трансфери учун қилинган Роналдунинг бойкоти сабаб, сўнгги соатларда бу рокировка ҳам тўхтаб қолди. Сабаби, Бенземанинг кетиш ё кетмаслиги аниқ бўлмасидан бошқа бир ҳужумчини олиб келиш – «Ал Иттиҳод» манфаатлари учун ҳам, Ан-Носирийнинг фаолияти учун ҳам зид келарди.

Канте Бензема билан бирга «Ал Иттиҳод»нинг муҳим фигураларидан бирига айланганди, лекин 34 ёшли яримҳимоячи жаҳон чемпионатида иштирок этиши учун барибир Европага яқин бўлиши керак. Туркия чемпионатида тўрт йилдан бери 2-ўриндан кўтарила олмаётган, охирги марта эса 12 йил олдин зафар қучган истанбулликлар учун Канте жуда яхши харид.

Марк Гейи («Кристал Пэлас»дан «Манчестер Сити»га) – 23 миллион евро

25 ёшли англиялик марказий ҳимоячи аслида ўтган ёздаёқ «Ливерпул» аъзоси бўлиши мумкин эди. Аммо лондонликлар вақтида ўринбосар топа олмагач, Оливер Гласнер бу келишувга «вето» қўйди. «Кристал Пэлас» билан шартномасининг сўнгги йилига қадам қўйган Маркнинг трансфери мана шу январда содир бўлишига ҳеч ким шубҳа қилмаган, зеро Лондон клуби футболчини текин қўйиб юборишдан кўра, қандайдир маблағ олишни кўзлаши табиий эди. Ҳаммаси Гейининг кимни танлашида бўлиб қолганди – қишга келиб унга «Ливерпул»дан ташқари, «Манчестер Сити», «Бавария» ва ҳатто «Барселона» ҳам талабгор бўлишди.

«Манчестер Сити» шу ўтган ойнинг ўзида иккинчи футболчи учун ҳам рақобатда устун келди ва етарлича тажрибали, Англия миллий жамоаси аъзоси бўлган Гейини нисбатан арзон нархга сотиб олди. Албатта, бу ерда футболчи учун таклиф қилинган маошнинг ҳам роли катта – норасмий манбаларнинг айтишича, Гейи ҳафтасига 300 минг фунтдан кўпроқ пул олади. Бу дегани, Марк Гейи бутун АПЛда энг катта маош оладиган беш футболчидан бирига айланди.

Диаш, Гвардиол, Стоунз каби футболчиларнинг жароҳати туфайли, Гейи дарҳол асосий ҳимоячига айланди ва Абдуқодир Ҳусанов билан кучли тандем ярата олишди. Маошлар мувозанати, таркибдаги бошқа футболчиларнинг ўйин вақти каби факторлардан қатъи назар, Пеп Гвардиола ҳозир ва дарҳол тайёр номзодларни бирин-кетин сотиб олаётгани эса бир нарсадан дарак беради – катта эҳтимол билан, испаниялик мутахассис ёзда Манчестерни тарк этади.

Тэмми Абраҳам («Бешиктош»дан «Астон Вилла»га) – 21 миллион евро

«Астон Вилла» каби клубларнинг ЕЧЛ каби мусобақалар учун курашиб, четда қолиши жуда оғир зарба ҳисобланади – ЕЧЛ учун таркиб йиғиб, маошларни ҳам шунга мослаб, лекин ЕЧЛ берадиган пулдан қуруқ қолиш дунё бренди бўлмаган, яъни даромад манбайи у қадар катта бўлмаган клублар учун салкам банкротлик дегани. Шу туфайли сўнгги йилларда «Астон Вилла» трансфер бозорида фаол эмас, асосан арзон вариантлар ва ижаралар билан таркибни кенгайтиришга уриниб келади. Ўтган мавсум оралиғида клуб Маркус Рэшфорд ва Марк Асенсиони ижарага олган ва мана шу жуфтлик мавсумнинг иккинчи ярмида анча ёрдам бера олишганди.

Бу сафар ҳам клуб мана шу мақсадда бозорга чиқди. Собиқ футболчиси Дуглас Луисни ижарага олган бўлса, Тэмми Абраҳам учун тўланган 21 миллион евро АПЛ учун анча кичик рақам ҳисобланади. Қолаверса, Тэммида АПЛда ўйнаш тажрибаси бор. Кўпчилик уни «Челси»да кашф қилинган деб ўйлайди, аммо аслида ҳужумчи илк кучли мавсумини айнан «Астон Вилла»да ўтказганди. Лэмпард уни асосий таркибда тушира бошлагандан аввалроқ у ижара асосида айнан «Вилла»да ўйнаган ва 26 гол уриб, жамоа Чемпионшипдан АПЛга қайтишига ҳисса қўшганди. Саккиз йиллик танаффусдан сўнг у яна «Астон Вилла»га қайтди ва бу сафарги мақсад каттароқ – Чемпионлар Лигаси.

Эндрик («Реал»дан «Лион»га) – ижара

Агар яна бироз Манчестерда мураббий алмашмай турганда Кобби Майну «Наполи»га ўтиб кетишга тайёр турганди. Аммо кейин барчаси ўзгариб, айни пайтда Майну «МЮ»нинг асосий таркиб футболчиси. Худди мана шунга ўхшаш ҳолат Эндрик билан ҳам содир бўлиши мумкин эди, аммо фарқли равишда Арбелоанинг келиши сал кечроқ содир бўлди. Эндрикка имконият бермаётган Хаби Алонсо истеъфога чиқишидан бироз олдин футболчи Францияга кетиб бўлганди.

Балки бу яхшиликкадир, зеро бразилиялик ҳужумчи жуда қисқа вақтда «Лион»да ўзининг бутунлай бошқа қирраларини ҳам намойиш этмоқда. Катта босим ва эътибордан бироз четлашгач, 19 ёшли футболчи анча эркин ва самарали ҳаракат қиляпти. Дастлабки уч ўйинда қаторасига учрашувнинг энг яхшиси деб топилган Эндрик аллақачон «Лион» тарқибида 5 гол ва 1 ассистни амалга оширишга улгурди. Мадриддаги икки йил, салкам 40 ўйинда майдонга тушиб у атиги 7 гол урганди холос.

Европа Лигаси фаворитларидан бири бўлган «Лион» учун ҳам, жаҳон чемпионати олдидан Бразилия таркибига киришга уринаётган Эндрик учун ҳам, ҳатто олти ой ўтиб янада улғайган ва ўзига ишонган ҳужумчига эга бўладиган «Реал» учун ҳам фойдали келишув.