Хитойнинг етакчи банкирларидан бири Лай Сяомин коррупция ва икки хотинлик учун ўлим жазосига маҳкум қилинди. “Молиявий катта тўртлик”ка кирувчи China Huarong Asset Management Co компаниясининг собиқ раҳбари ўзига қўйилган 10та айблов пункти бўйича айбини тан олди.
Банкир компанияга раҳбарлик қилган вақтда 1,79 млрд юан (276 млн доллар) миқдорида пора олишда айбланган. Тянцзин судида таъкидланишича, Лай “ўта катта миқдорда пора олиш учун” ўз мавқейидан фойдаланган ва унга нисбатан ўлим жазоси чиқарилишида ишнинг ўта жиддийлиги ҳисобга олинган.
Лай, шунингдек, икки хотинликда ва никоҳсиз фарзандлари борлигида, давлат бюджетидан 25 млн юандан кўпроқ пул ўғирлаганликда айбланган. Бундан ташқари, унга тегишли активлар мусодара қилинади ва у сиёсий ҳуқуқлардан маҳрум этилади. Лайга ўлим жазоси 2 йиллик кечиктиришсиз чиқарилган ва бу у содир этган жиноятларнинг ўта оғирлигидан дарак беради. Ўлим жазоси ижросининг кечиктирилиши ўлим жазосини 2 йилдан кейин 25 йиллик ёки умрбод қамоқ жазоси билан алмаштириш имконини беради.
Юқори лавозимли банкирнинг қилғилиқлари ҳақидаги иш бутун Хитойни ларзага солган. Маҳаллий ОАВда таъкидланишича, Лайнинг Пекиндаги уйида пул билан лиқ тўла сейф ва шкафлар топилган. Caixin нашрининг хабар беришича, Лайда олтин ёмбилар ва қимматбаҳо автомобиллар, онаси номига очилган ҳисобрақам ва кўчмас мулк топилган.
Лай 2018 йилда ҳибсга олинган ва Коммунистик партиядан четлатилган. Лайнинг ўзи “ўғирлаган пуллардан бир юанини ҳам сарфламагани, шунчаки уларни жамғарганини” айтган.
Тянцзин судининг таъкидлашича, Лай ўз жиноятларини Хитой раиси Си Цзинпин томонидан катта кўламли аксилкоррупцион кампания эълон қилинган 2012 йилдан кейин содир этган. Ушбу кампания давомида юз минглаб амалдорлар коррупция, товламачилик, давлат маблағларини харжлаб юбориш ва бошқа жиноятлар учун жазоланган.
