ЕИ BioNTech/Pfizer билан яна 300 млн доза вакцина сотиб олиш тўғрисида шартнома имзолади

Евроиттифоқ BioNTech ва Pfizer компаниялари билан коронавирусга қарши қўшимча 300 млн доза вакцина сотиб олиш бўйича шартнома имзолади. Бу ҳақда Еврокомиссия раиси Урсула фон дер Ляйен маълум қилди.

 Фон дер Ляйеннинг сўзларига кўра, 75 млн доза вакцина 2021 йилнинг иккинчи чорагида етказиб берилади.  

 Қўшимча вакцина етказиб бериш бўйича шартнома имзоланишига Германия ва бошқа мамлакатларнинг аҳоли учун вакцина етмаслиги мавзуси бот-бот кўтарилганидан сўнг эришилди. 

 Фон дер Ляйеннинг таъкидлашича, вакцина ЕИга аъзо мамлакатлар ҳукуматларининг розилигидан сўнг етказиб берилади.

2020 йил декабрда ЕИ BioNTech/Pfizer вакцинасидан фойдаланишга рухсат берганди.

6 январ куни ЕИ Moderna компанияси вакцинасидан ҳам фойдаланишга рухсат берди. Еврокомиссия ушбу компания билан 160 млн доза вакцина етказиб бериш бўйича шартнома имзолади.

2020 йил ноябрда Еврокомиссия BioNTech ва Pfizer компаниялари билан 200 млн доза вакцина етказиб бериш ҳамда қўшимча 100 млн доза вакцина сотиб олиш эҳтимоли билан шартнома имзолаганди.