Вашингтон Анқарага С-400 ўрнига АҚШнинг Patriot мажмуаларини сотиб олишни таклиф қилганди.
Туркия мудофаа саноати котибияти раҳбари Исмоил Демир Россиянинг С-400 зенит-ракета тизимлари фойдаланишга тайёр ҳолга келтирилганини маълум қилди.
"С-400 фойдаланишга тайёр, қуролли кучлар зарурат бўлганида бу борада қарор қабул қилиши мумкин", - деди Демир.
Бундан ташқари, унинг хабар қилишича, Туркия корхоналари Американинг F-35 бешинчи авлод қирувчи самолётларини ишлаб чиқиш лойиҳасида иштирок этмоқда.
Туркия ва АҚШ ўртасидаги муносабатларда совуқчилик тушишига сабаб бўлган С-400 мажмуалари Туркияга 2019 йил июлдан бошлаб етказилганди.
Вашингтон Анқарага ушбу битимдан воз кечишни ва Туркияга F-35 қирувчи самолётлари сотишни бекор қилиш ва санкциялар киритиш билан таҳдид қилиб, С-400 ўрнига АҚШнинг Patriot мажмуаларини сотиб олишни таклиф қилганди.
Бироқ Анқара ён босишни истамаган ва Россия билан С-400’нинг қўшимча партияларини сотиб олиш бўйича музокараларни давом эттирганди.
2020 йил декабрда АҚШ С-400 зенит-ракета мажмуалари сотиб олингани учун Туркия мудофаа саноати котибияти, унинг раҳбари Исмоил Демир ва яна уч мансабдор шахсига нисбатан санкциялар жорий этди.
