SpaceX компанияси 24 январда бортида 143та сунъий йўлдош бўлган Falcon 9 ракетасини фазога учирди. Бу фазогирлик тарихида бир вақтда фазовий қурилмаларнинг орбитага чиқарилиши бўйича рекорд кўрсаткич ҳисобланади.
Ракета Флоридадаги космодромдан АҚШ Шарқий соҳили вақти бўйича соат 10да старт олган.
Ракета бортида 30та буюртмачининг 143та, жумладан Starlink интернет тармоғининг 10та сунъий йўлдоши орбитага чиқарилади. Қурилмаларнинг умумий оғирлиги 5 тоннани ташкил қилади. Компанияда таъкидланишича, бу бир парвоз вақтида орбитага чиқарилган энг кўп сондаги фазовий қурилма ҳисобланади.
Дастлабки режага кўра, ракета 23 январда старт олиши керак эди, бироқ ёмон об-ҳаво сабабли парвоз бир кунга қолдирилган.
Ракета стартидан 9 дақиқа кейин унинг биринчи поғонаси Атлантика океанидаги махсус платформага қўндирилган. Бунгача ушбу поғона бир неча марта такрор ишлатилган.
20 январда ҳам Falcon 9 ракетаси Starlink’нинг 60та сунъий йўлдошини орбитага олиб чиққанди. Жорий парвоз ушбу лойиҳа доирасидаги 17-парвоз ҳисобланади. Бунгача лойиҳа доирасида орбитага чиқарилган сунъий йўлдошлар сони 1013тага етганди.
