Илон Маск компанияси коинот станциясига 3 сайёҳни етказади

2021 йилда америкалик тадбиркор Илон Маскнинг SpaceX компанияси Халқаро коинот станциясига 3 нафар сайёҳни етказади. Улар станцияда 8 кун қолишади.

(Фото: NASA / SpaceX / Wikimedia Commons

Парвозни ташкиллаштираётган Axiom Space компанияси SpaceX’нинг Crew Dragon кемасида ХКСга америкалик ва канадалик сармоячилар Ларри Коннор ва Марк Пати ҳамда исроиллик тадбиркор Эйтан Стиббе юборилишини маълум қилди.

Уларга NASA’нинг собиқ астронавти, ҳозирда Axiom Space вице-президенти Майкл Лопес-Алегрия экипаж сардори сифатида ҳамроҳлик қилади.

Axiom Space компанияси 2020 йилда SpaceX билан ХКСга 3 нафар фазовий сайёҳни жўнатишга келишиб олган. Режага кўра, парвоз жорий йил охиригача амалга оширилади. Сайёҳлар станцияда 8 кун ўтказишади.

Business Insider нашрининг хабар беришича, Ax-1 деб ном оладиган миссия октябрда амалга оширилиши мумкин. Экипаж таркибига Стиббедан ташқари, актёр Том Круз ва кинорежиссёр Дуг Лайман ҳам кириши кутилганди. Аввалроқ Variety нашри манбаларга таяниб, Universal Pictures кинокомпанияси фазода суратга олинадиган илк фильм бўйича музокаралар олиб бораётганини маълум қилганди.