Япония бош вазири карантин вақтида тунги клубларга борган амалдорлар учун узр сўради    

Маълум қилинишича, Япониянинг ҳукмрон коалициясидан бир неча амалдор ҳукумат ресторан ва барларга ташриф буюриш бўйича кескин чекловлар киритганига қарамай, тунги клубларда вақтичоғлиқ қилган. Чекловларга кўра, ресторан ва барларда спиртли ичимликлар сотиш 19дан кейин тўхтатилади, уларнинг иш вақти эса 20гача қисқартирилган.   

“Биз одамларга соат 20дан кейин уйларида ўтиришни ва кераксиз сайрлардан тийилишни сўраган бир пайтимизда бундай бўлганидан жуда афсусдаман. Ҳар бир қонун чиқарувчи жамият томонидан тўғри қабул қилиниш учун ўзини муносиб тутиши лозим”, деб айтган Суга.

Япониянинг ҳукмрон Либерал-демократик партиясидан Дзюн Мацумото 25 январда Токиодаги тунги клубларга ташриф буюрганини тан олган амалдорлардан бири бўлди.

“Биз қолганларни сабрли бўлишга чорлаган бир пайтда менинг бу ишим лоқайдлик ҳисобланади”, деб айтган депутат.

Аввалроқ Японияда коронавируснинг юқумлироқ “британ” варианти аниқлангандан кейин пойтахт Токио ва унинг атрофидаги шаҳарларда бир ойга фавқулодда вазият режими киритилиши эълон қилинганди.