Украина мухолифати Зеленскийга импичмент эълон қилмоқчи

Бунга Владимир Зеленскийнинг 112, Newsone ва ZIK телеканаллари фаолиятини тўхтатиш тўғрисидаги қарори сабаб бўлди.

Фото: ТАСС

"Оппозиционная платформа - За жизнь" (ОПЗЖ) фракцияси Украина президенти Владимир Зеленскийга нисбатан импичмент жараёнини бошлайди, деди ОПЗЖ партияси ҳамраиси Вадим Рабинович.

"Бугун мустақил Украина тарихида илк бор бирданига учта етакчи телеканал ўчириб қўйилди. Яқин вақт ичида кейинги қадамларимизни белгилаб берадиган партия съездини ўтказамиз. Биз сайловчилар, мамлакатни таҳқирлаган президент Зеленскийнинг импичменти процедурасини бошлаймиз", - деди Рабинович олий рада минбаридан.

Рабинович Владимир Зеленскийни одамларга коммунал тарифлар, коронавирусга қарши вакцина йўқлиги, тиббиёт издан чиққани ва бошқа муаммолар ҳақида «ҳақиқатни айтаётганларнинг оғзини ёпишга уриниш»да айблади.

2 феврал куни Владимир Зеленский 112, Newsone ва ZIK телеканаллари фаолиятини тўхтатиш тўғрисида қарор қабул қилди.

Мазкур телеканаллар ОПЗЖ етакчиларидан бири Виктор Медведчукка алоқадор деб ҳисобланади.