Украина Россиядаги стратегик объектларга зарбаларни кенгайтирмоқчи

Украина Қуролли кучлари таркибида «Россияга узоқ масофадан таъсир кўрсатиш бўйича махсус қўмондонлик» ташкил этилди. Бу ҳақда Украина президенти Володимир Зеленский 10 июл, жума куни кечқурунги видеомурожаатида маълум қилди. 

Зеленскийнинг баёнотидан англашилишича, янги қўмондонлик Россия ҳудудининг Украина чегарасидан анча узоқда жойлашган объектларига дронлар ва бошқа узоқ масофали воситалар орқали зарба бериш операцияларини ташкил этиш ва мувофиқлаштириш билан шуғулланади.

Украина президентининг таъкидлашича, мамлакат ҳарбийлари Россия томонидан Украинага қарши ҳужумлар амалга оширилаётган ҳудудлардаги нишонларга зарба бериш учун янада кенг имкониятларга эга бўлиши керак.

«Ҳарбийларимиз Россия босқинчиларини айнан Украинага қарши уруш олиб борилаётган жойларда — Россия ҳудудида йўқ қилиш учун кўпроқ имкониятга эга бўлиши лозим», деди Зеленский.

Унинг сўзларига кўра, янги қўмондонлик мавжуд барча ресурсларни бир йўналишга жамлаб, Россиянинг уруш олиб бориш салоҳиятини янада сезиларли даражада камайтиришга хизмат қилиши керак.

Шу билан бирга, Зеленский янги тузилманинг таркиби, ваколатлари, техник имкониятлари ёки унга ким раҳбарлик қилиши ҳақида батафсил маълумот бермади. У фақат мазкур йўналишга кучли ва катта тажрибага эга қўмондон тайинланишини айтди.

Зеленский Россиядаги ёнилғи муаммосига ҳам тўхталди

Украина раҳбари ўз видеомурожаатида Россиядаги нефтни қайта ишлаш корхоналарига берилган дрон зарбалари мамлакатда бензин тақчиллигини кучайтираётганини ҳам билдирди.

Зеленскийнинг иддао қилишича, Россиядаги ёнилғи билан боғлиқ муаммолар президент Владимир Путиннинг яқин атрофидаги шахсларнинг кайфиятига ҳам таъсир кўрсатмоқда.

Унинг фикрича, Путин Украинага қарши кенг кўламли урушни якунлашни истамаса-да, Россия сиёсий доираларида тинчликка эришиш заруратини тушунаётганлар бор.

«Биз тинчликни қандай яқинлаштириш мумкинлиги бўйича таклифларимизни тақдим этдик. Бу таклифлар нафақат халқаро ҳамкорларимиз, балки Путин атрофидаги айрим шахслар томонидан ҳам қўллаб-қувватланмоқда. Улар вазиятни ва тинчликка муқобил йўл йўқлигини тушунмоқда», деди Зеленский.

Украина президентининг қўшимча қилишича, Россия ичида бундай қарашлар келгусида янада кучайиши мумкин.

Россия ҳукумати ёнилғи тақчиллигига дрон ҳужумлари сабаб бўлганини тан олди

Зеленскийнинг мурожаатидан бир неча соат аввал Россия бош вазири ўринбосари Александр Новак мамлакатдаги бензин тақчиллигига изоҳ бериб, муаммонинг сабабларидан бири Украина дронларининг Россия нефтьни қайта ишлаш заводларига давом этаётган ҳужумлари эканини тан олди.

Унинг айтишича, дронлар зарбаси оқибатида айрим корхоналар қисман ишдан чиқмоқда.

Новак Россия автомобил ёнилғи қуйиш шохобчаларидаги вазиятни бензин тақчиллиги сифатида баҳолаган бўлса-да, мамлакатда нефтни қайта ишлаш учун етарли қувватлар мавжудлигини таъкидлади.

У Россия ички бозорни ёнилғи билан тўлиқ таъминлаш имкониятига эга эканини ва ҳатто нефт маҳсулотларини экспорт қилишда давом этаётганини билдирди.

Шу билан бирга, хабарда қайд этилишича, Россия нефт маҳсулотларини хорижга етказиб беришни давом эттираётган бўлса-да, июн ойида қўшни давлатлардан бензин ва дизел ёнилғиси импорт қилишни бошлаган.

Аввалроқ Кремл вакиллари мамлакатдаги ёнилғи муаммолари Украина дронларининг нефтни қайта ишлаш заводларига берган зарбалари билан боғлиқ эканини очиқ тан олишдан қочиб келган эди.