Лвивда оломон ҳарбий комиссариат автомобилини ағдариб ташлади

Украинанинг Лвив шаҳрида ҳудудий тўлдириш маркази (ТЦК, Украинадаги ҳарбий комиссариат) ходимлари билан тўқнашув иштирокчилари камера қаршисида ҳарбийлардан узр сўрашга мажбур қилинди. Ушбу видео Украина қуролли кучлари фахрийси Антон Петровский ҳамда 3-армия корпуси командири ўринбосари Дмитрий Кухарчук томонидан эълон қилинган. Улар тартибсизлик иштирокчилари билан «тарбиявий суҳбат» ўтказилганини билдиришган.

Роликлардан бирида Лвивда яшовчиларнинг бир гуруҳи (улар орасида ўсмирлар ҳам бор) «ТЦКга шон-шарафлар!» дея ҳайқираётганини кўриш мумкин. Кейин видеодагилардан икки киши ўз ҳаракатлари учун узр сўраган. Улардан бири Украина қуролли кучлари сафида хизматга боришни ваъда қилади. Бошқаси таътилдаги ҳарбий эканини, тез орада фронтга қайтишини айтади.

Шаҳар аҳолиси вакиллари ва ҳарбийлар ўртасидаги тўқнашувлар 8 июл куни кечқурун Сиховда рўй берган. Сафарбарлик тадбири чоғида оломон ҳудудий тўлдириш маркази автомобилига шикаст етказган ва уни ағдариб ташлаган. Лвивдаги нашрларда ёзилишича, йўлдан ўтиб кетаётган одамлар ТЦК гуруҳини пайқаб қолишган ва ҳарбийларнинг ишига аралаша бошлаган. Даҳанаки жанжал ўзаро тўқнашувга айланиб кетган. Ижтимоий тармоқларда оломон ҳарбийларнинг шикаст етказилган автомобилини ўраб олгани ва «Шармандалик!» ҳайқириқлари остида уни ағдаришга уринаётгани акс этган видео тарқалган.

Лвив области ҳудудий тўлдириш маркази версиясига кўра, можаро ушбу шаҳарда яшовчи, ҳарбий рўйхатдан ўтиш қоидаларини бузгани учун 12 июндан буён қидирувда бўлган шахс (1996 йилда туғилган)нинг ҳужжатларини текшириш асносида бошланган. Ҳарбийлар уни ушбаб, ТЦК биносига олиб келишган. Оломон эса марказнинг яна бир неча ходими йўлини тўсиб, уларнинг хизмат машинасини ўраб олган. Қайд этилишича, Лвив аҳолиси вакиллари ўзини тажовузкор тутиб, сезиларли зарар етказган ва якунда хизмат автомобилини ағдариб юборган».

Прокуратура маълумотларига кўра, тўқнашувларда жами 200 га яқин киши иштирок этган. Тўқнашувлар оқибатида икки ҳарбий жароҳатланган. Украина қуролли кучлари фаолиятига тўсқинлик қилиш ва ҳуқуқ-тартибот идоралари ходимига нисбатан зўравонлик бўйича иккита жиноий иш қўзғатилган. Тартибсизлик иштирокчиларидан бири ҳибсга олинган. Бу 23 ёшли Олег Гаврилов бўлиб, тергов маълумотларига кўра, у полициячилардан бирига газ баллончасини пуркаган, бошқа бир полициячини урган. Судда Гаврилов 53-алоҳида механизациялашган бригадада оддий аскар сифатида хизмат қилгани, шу йил февралида ҳарбий қисмни ўзбошимчалик билан тарк этганини айтиб берган. Адвокатнинг сўзларига кўра, ҳибсга олиш чоғида уни калтаклашган.

Ҳудудий тўлдириш маркази ҳам хизмат текшируви бошланганини маълум қилди. Унинг натижаларига кўра, можаронинг барча иштирокчилари, жумладан, воқеа жойида бўлган ҳарбийлар ва полициячиларнинг ҳаракатлари баҳоланиши керак. Лвивдаги «Захід» нашри хабар беришича, воқеа жойига етиб келган полициячилар можарони четда кузатиб турган ва ҳарбийлар автомобили ағдариб ташланишига тўсқинлик қилмаган. Бундан ташқари, ижтимоий тармоқларда ҳарбийлардан бири фуқарони ургани акс этган видео тарқалди. ТЦКдагилар эса видео контекстдан юлиб олинган ва бу ўзини ҳимоя қилиш бўлиши мумкинлигини таъкидаган. «Страна» нашри эса айнан шундан кейин тартибсизлик бошлангани ҳақида ёзган.

Украина президенти офиси раҳбари Кирилл Буданов биринчилардан бўлиб ушбу воқеа юзасидан муносабат билдирди. «Агар сиз бугун ўз армиянгиз ҳарбий хизматчисининг кийимларини йиртиб, калтаклаётган бўлсангиз, эртага сизни худди шундай калтаклайдиган ва кийимларингизни йиртиб ташлайдиган душман армиясидан ким ҳимоя қилишини ўйлаб кўринг», – деди у ва ҳуқуқ-тартибот органларининг «адолатли реакцияси»ни кутаётганини таъкидлади.

Украина мудофаа вазирлиги ҳам «ҳарбий хизматчиларга қилинган ҳужум»ни қоралаб, бу вазиятдан фақат Россия фойда кўрганини таъкидлади (Лвивда олинган видеолар, жумладан, узр сўратиш ҳолати акс этган кадрлар Россиядаги нашрларда кенг тарқалди). Вазирлик сафарбарлик – «Украинани ҳимоя қилишнинг зарур таркибий қисми» эканини қўшимча қилган, бироқ унинг усуллари «такомиллаштиришни талаб қилиши»ни тан олган.

Лвивдаги воқеадан кейин Олий Раданинг инсон ҳуқуқлари бўйича вакили Дмитрий Лубинец ҳам Украинага сафарбарлик ислоҳоти кераклигини айтиб чиқди. У давлат манфаатларини ҳам, инсон ҳуқуқларини ҳам бирдек ҳимоя қиладиган «шаффоф, тушунарли ва адолатли қоидалар» яратиш лозимлигини таъкидлаган.

Украина президенти Володимир Зеленский Лвивдаги тартибсизликларга бир кун ўтиб муносабат билдирди. «Бу жуда ёмон ҳолат, ҳарбий кийимдаги одамларга нисбатан жуда ёмон муносабат. Бундай бўлмаслиги керак», – деди у ва тегишли идоралар вазият билан шуғулланаётганини қўшимча қилди.

Украина аҳолиси анчадан бери узоқ чўзилган ҳарбий ҳаракатлар ва мамлакатда давом этаётган сафарбарлик фонида ТЦК ходимларининг ноқонуний хатти-ҳаракатлари ва чақирув ёшидаги эркакларни кўчаларда ноқонуний тарзда ҳибсга олиб, микроавтобусларга мажбуран ўтқазишидан шикоят қилиб келади. Украина омбудсмани маълумотига кўра, 2025 йилда ҳудудий тўлдириш марказлари ходимларининг хатти-ҳаракатлари устидан 6 мингдан ортиқ шикоят келиб тушган.