Британияда мамлакатга киришда карантин тартибини бузганларга кескин жазо қўлланилади

Мамлакатга киришда коронавирусга тест топширмаганлик учун 1000 фунт стерлинг жарима белгиланди.

Британия ҳукумати чегарада карантин тартибини бузганлик учун жазо чораларини кучайтирмоқчи. Бу ҳақда мамлакат соғлиқни сақлаш вазири Мэтт Ҳенкок маълум қилди.

«Бу ерга келишидан 10 кун олдин «қизил рўйхат»имиздаги мамлакатлардан бирида бўлганлигини яширишга уринган ҳар қандай шахс 10 йил муддатга озодликдан маҳрум қилинади», — деди у.

Мамлакатга киришда коронавирусга тест топширмаганлик учун 1000 фунт стерлинг жарима белгиланди. Иккинчи мажбурий тестни топширмаганларга 2000 фунт стерлинг жарима солинади ва мажбурий карантин 14 кунгача узайтирилади.

Мамлакатга келгандан сўнг карантин тартибини қайта бузганлик учун жарима 10 минг фунтни ташкил этади.

Ҳозирда Британиянинг «қизил рўйхат»ига 33 мамлакат киритилган.

Охирги маълумотларга кўра, мамлакатда коронавирус юқтириш ҳолатлари сони 4 миллионга яқинлашган, 112 мингдан ортиқ киши вафот этган.