Қўшимча функционаллар
-
Тунги кўриниш
Германияда ўзи ишлаб чиққан вакцинани синовдан ўтказган шифокорга нисбатан иш қўзғатилди
Любекда лабораторияга эга бўлган профессор, тиббиёт фанлари доктори Штёккер коронавирусга қарши эҳтимолий вакцина ишлаб чиққан ва уни ўзи ҳамда бошқаларда синаб кўрган.
Германиянинг Любек шаҳри прокуратураси коронавирусга қарши вакцина яратиш бўйича тажриба ўтказгани учун шифокор ва бизнесмен Винфрид Штёккерга нисбатан иш қўзғатди. 74 ёшли Штёккер дори воситалари тўғрисидаги қонунни бузганликда гумонланмоқда.
Тергов маълумотларига кўра, Любекда лабораторияга эга бўлган профессор, тиббиёт фанлари доктори Штёккер коронавирусга қарши эҳтимолий вакцина ишлаб чиққан ва уни ўзи ҳамда бошқаларда синаб кўрган.
Der Spiegel журналининг ёзишича, у вакцинани хотини ва болалари ҳамда 65 нафар кўнгиллида синовдан ўтказган. Ўзининг таъкидлашича, эмлашдан сўнг ҳеч қандай ножўя таъсир кузатилмаган ва барча эмланганларда антитаналар пайдо бўлган.
У сентябр бошларида синов натижалари ҳақида вакциналарни рўйхатга олиш ва мониторинг қилиш бўйича масъул Паул Эрлиҳ номидаги институтга хабар қилган. У синов миқёсини кенгайтиришни сўраган, институт эса бунга жавобан прокуратурага мурожаат қилган.
Штёкер 1987 йилда аутоиммун ва юқумли касалликларни аниқлаш усулларини ишлаб чиқиш билан шуғулланувчи Euroimmun компаниясига асос солган. У компанияни 2017 йилда АҚШдаги концернлардан бирига 1,2 млрд еврога сотган. Euroimmun ҳозирда 17 мамлакатда ўз ваколатхонасига эга.
