ЕИ Россияга қарши янги санкциялар киритиш масаласини муҳокама қилишни бошлади

Евроиттифоқ Алексей Навалний билан боғлиқ вазият туфайли Россияга нисбатан янги санкциялар жорий этиш масаласини муҳокама қилишга киришди. Бу ҳақда ўз манбаларига таяниб Bloomberg агентлиги хабар бермоқда.

 Манбаларнинг маълумот беришича, муҳокамаларда ЕИ мамлакатларининг Брюсселдаги элчилари иштирок этган.

“Ҳеч қайси давлат Россияга нисбатан янги санкциялар киритилишига қаршилик билдирмади”, деган агентлик билан суҳбатлашган дипломатлардан бири.

 23 ва 31 январ кунлари Россияда Алексей Навалний ва бошқа сиёсий маҳбусларни қўллаб-қувватлаш бўйича норозилик намойишлари бўлиб ўтди. Бунга даволанишдан сўнг Германиядан Россияга қайтган мухолифатчининг ҳибсга олиниши сабаб бўлди.

 2 феврал куни Москванинг Симоновский суди Алексей Навалнийга нисбатан 3,5 йилни умумий тартибдаги колонияда ўташ жазосини тайинлади.

Россия Навалнийни қўллаб-қувватлаш учун ўтказилган митингда қатнашгани сабабли Германия, Польша ва Швециянинг уч нафар дипломатини мамлакатдан чиқариб юборишини эълон қилди. Бунга жавобан юқоридаги давлатлар россиялик дипломатларнинг чиқариб юборилишини маълум  қилди.