Япониядаги зилзила оқибатлари: 30 киши жароҳатланди, бир миллионга яқин хонадон электрсиз қолди

Японияда содир бўлган кучли зилзила оқибатида камида 30 киши жароҳатланди. Бу ҳақда The Japan Times хабар бермоқда.

Хабарда айтилишича, Мияги ва Фукусима префектураларида яшовчилар жабр кўрган бўлиб, уларнинг жароҳатлари қай даражада жиддийлиги ҳақида маълумот берилмаган.

Шунингдек, мамлакатда 950 мингта уй электр таъминотисиз қолганлиги маълум қилинмоқда. Зилзиладан сўнг Япониядаги бир нечта электр станцияси ўчириб қўйилган.

Эслатиб ўтамиз, 13 феврал куни Японияда рихтер шкаласи бўйича 7,1 магнитудали зилзила содир бўлди. Зилзила маркази Фукусима префектураси ҳудудидаги Тинч океани ҳавзаси бўлгани айтилмоқда.