Кичик тадбиркорлик субъектларининг асосий капиталга киритган инвестициялари ва қурилиш ишларидаги улуши очиқланди

Давлат статистика қўмитаси маълумотларига кўра, 2020 йилнинг январ-декабр ойларида кичик тадбиркорлик субъектларининг асосий капиталга киритилган инвестициялар ҳажмидаги улуши 49,7 фоизни ташкил этган.

Ҳудудлар бўйича энг юқори кўрсаткичлар Жиззах (80,5 фоиз), Наманган (73,9 фоиз), Хоразм (72,2 фоиз), Самарқанд (71,6 фоиз) вилоятлари ҳиссасига тўғри келган. Таққослаш учун, энг паст кўрсаткичлар Қашқадарё (18 фоиз), Навоий (33,2 фоиз) вилоятлари ва Қорақалпоғистон Республикасида (28,2 фоиз) қайд этилган.

Шунингдек, 2020 йилнинг январ-декабр ойларида бажарилган қурилиш ишларида кичик тадбиркорлик субектлари улуши 72,4 фоизга тенг бўлган.

Ҳудудлар бўйича энг юқори кўрсаткичлар Сирдарё (97,5 фоиз), Жиззах (96,3 фоиз) ва Андижон (93,4 фоиз) вилоятларига тўғри келган.

Энг паст кўрсаткичлар эса Тошкент шаҳри (71,1 фоиз), Навоий (78,6 фоиз) ва Бухоро (79,4 фоиз) вилоятларида қайд этилган.

Маълумот учун, 2020 йилнинг январ-декабр ойларида 202 триллион сўм асосий капиталга бўлган инвестициялар ўзлаштирилган. Уларнинг 65,4 фоизи жалб этилган маблағлар ҳисобидан молиялаштирилган. Корхона, ташкилот ва аҳолининг ўз маблағлари ҳисобидан молиялаштирилган сумма эса 34,6 фоизни ташкил этди. Бу кўрсаткич 2019 йилнинг мос даврига нисбатан 8,2 фоизга кам ҳисобланади.