Америка-Ўзбекистон ишбилармонлик ва инвестиция кенгашининг илк аъзолари эълон қилинди

Бу ҳақда 16 июнь куни Ўзбекистондаги АҚШ элчихонаси хабар берди.

Кенгашнинг биринчи аъзолари:

• АҚШ Халқаро тараққиётни молиялаштириш корпорацияси (DFC) вице-президенти Бетани Аквилина Брез;

• АҚШ Эксимбанки катта вице-президенти Сара Уиттен;

• Савдо вазири ўринбосари Дэвид Фогел;

• Калеб Орр, давлат котибининг иқтисодий, энергетика ва бизнес масалалари бўйича ўринбосари;

• Ўзбекистондаги АҚШ элчиси Жонатан Ҳеник.

Кенгаш фаолиятига 2026 йил апрель ойида Вашингтонда расман старт берилган эди. Платформа икки мамлакат ўртасидаги савдони жадаллаштириш ва хусусий сектор инвестицияларини рағбатлантириш учун асосий майдон ҳисобланади. Кенгашнинг ҳамраислари АҚШ президентининг Жанубий ва Марказий Осиё бўйича махсус вакили, элчи Сержио Гор ва Ўзбекистон президенти администрацияси раҳбари Саида Мирзиёева ҳисобланади.

Кенгаш Америка компанияларига АҚШ ҳукумати томонидан молиялаштиришга, Ўзбекистонда йирик лойиҳаларни амалга ошириш учун савдони ривожлантириш ва бозорни ривожлантириш воситаларига бевосита кириш имконини беради.

«Ўзбекистон АҚШ технология, мудофаа ва энергетика соҳалари учун зарур бўлган муҳим фойдали қазилмаларнинг салмоқли захираларига эга. Кенгаш Қўшма Штатларнинг ушбу ресурслардан фойдаланишини шаффоф, ўзаро манфаатли ҳамкорлик орқали кенгайтириш учун бевосита механизмни таъминлайди. Кенгашнинг америкалик аъзолари ўз иштироки билан Қўшма Штатларнинг Ўзбекистондаги тижорат ҳамкорлиги учун институционал асосни чуқурлаштиради», дейилади АҚШ элчихонаси хабарида.

АҚШ-Ўзбекистон ишбилармонлик ва инвестиция кенгаши 2025 йил 6 ноябрда бўлиб ўтган «Марказий Осиё - АҚШ» (C5+1) саммитида эришилган келишувлар доирасида ташкил этилган. Кенгашнинг биринчи йиғилиши 2026 йил февраль ойида бўлиб ўтди.