Маълум бўлишича, бекатларга электр кабел ўтказиш кўприкчалари («кабельний мостик») ўрнатилмоқда. Эстакаданинг остки қисми шу мақсадда тунги вақтда, белгиланган лойиҳа асосида тешилган.
Бугун, 24 феврал куни, ижтимоий тармоқларда Тошкент ерусти ҳалқа метросининг “Дўстлик-2” бекатидан “Қўйлиқ” бекатигача бўлган йўналишнинг поезд йўли қисмидаги бетоннинг бир бўлаги “кўчиб тушгани”га оид видеолавҳа тарқалди.
“Мана аҳвол, бу бировнинг бошига тушса нима бўларди?” - дея савол билан мурожаат қилган лавҳа муаллифи.
Ҳали фойдаланишга топширилганига бир йил ҳам бўлмаган иншоотларнинг бундай ҳолга келиши кўпчиликда норозилик уйғотди. Вазиятга “Ўзбекистон темир йўллари” расмий сайтида изоҳ берилди.
Қайд этилишича, бугунги кунда “Дўстлик-2” – “Қўйлиқ” йўналиши бекатларида кабел учун ўтказиш кўприги (“кабелний мостик”) қуриш ишлари лойиҳа ҳужжатларига асосан қурилишнинг II-босқичида амалга ошириш режалаштирилган. Электр кабелларини эстакада остки қисмидан ўтказиш иншоотлари қурилиши лойиҳалари ишлаб чиқилиб, ўрнатилган тартибда экспертизадан ўтказилган ва ижобий хулоса олинган. Бугунги кунда бекатларда кабел ўтказиш кўпригини қуриш ишлари амалга оширилмоқда.
“Ижтимоий тармоқларда тарқаган “ўпирилиш” юзасидан. Метронинг 4-бекатида қурувчилар томонидан 24 феврал куни тунги соат 00:00дан кейин, яъни метро поездлари ҳаракати тўхтатилгандан сўнг, кабел ўтказиш кўпригини қуриш учун махсус ускуна ёрдамида лойиҳа ҳужжатларига асосан бетоннинг бир қисми очилган.
Метро эстакадаси остидан ҳаракатланувчи пиёдалар ва автомобиллар хавфсизлигини таъминлаш мақсадида тунги пайтда ишлар ташкил қилиниб, қурилиш меъёр ва қоидалари асосида амалга оширилмоқда ва мутахассислар томонидан назоратга олинган хавфсизлик қоидаларига риоя этилади. Кабел ўтказиш кўприги қурилиши эстакада мустаҳкамлигига зарар етказмайди. Махсус дарча очиш ишлари якунлангандан сўнг йўлдаги чиқиндилар тозаланган”, дейилади маълумотда.
