Германияда миллий миқёсдаги эпидемия режими уч ойга узайтирилди

Аввалроқ мамлакатда амал қилиб келаётган локдаун 28 мартгача узайтирилганди.

Фото: Getty Images

Германия бундестаги коронавирус пандемияси сабабли жорий этилган миллий миқёсдаги эпидемия режимининг амал қилиш муддатини уч ойга – 30 июнгача узайтирди. Бу борадаги тегишли қонун 4 март куни қабул қилинди.

Миллий миқёсдаги эпидемия режими ноозиқ-овқат дўконларининг ёпилиши ва ижтимоий мулоқотларни камайтириш каби чеклов чораларини киритиш учун асос бўлиб хизмат қилади.

Аввалроқ мамлакатда амал қилиб келаётган локдаун 28 мартгача узайтирилганди. Шу билан бирга, ҳукумат 8 мартдан айрим чекловларни олиб ташлашга қарор қилган. Хусусан, китоб ва гул дўконлари, косметика салонлари, автомактаблар ва учувчилар тайёрлаш билим юртлари очилади. Бундан ташқари, ҳар бир фуқаро ҳафтада бир марта коронавирусга бепул экспресс-тест топшириш имкониятига эга бўлади.

Охирги маълумотларга кўра, Германияда коронавирус юқтирганлар сони 2,5 миллионга яқинлашган, 71,7 мингдан ортиқ бемор вафот этган.

Тайёрлаган Дилшод Аскаров

#Германия #коронавирус

2019 йилнинг декабрь ойи охирида Хитойнинг Ухань шаҳрида номаълум вирус тарқала бошлади. Бу вирус ҳаво орқали одамдан одамга юқади ва ўлимга олиб келади.