Украина Германия ишлаб чиқараётган 600 та ракетага буюртма берди

Зеленскийнинг сўзларига кўра, Германия мазкур ракеталарни ишлаб чиқариш учун АҚШдан тегишли лицензияларни олган ва ишлаб чиқариш жараёнини бошлаган. Украина эса немис ишлаб чиқарувчилари билан юзлаб миллион долларлик келишувни расмийлаштирган.

«Биз улар билан катта миқдордаги маблағни ўз ичига олган шартномани имзоладик. Гап 600 та ракета ҳақида кетмоқда», — деди Украина раҳбари.

Айни пайтда Германия ҳукумати мазкур маълумот юзасидан ҳали расмий изоҳ берганича йўқ.

Украина президенти Европа давлатлари, хусусан Германияда Patriot тизимлари учун ракеталар ишлаб чиқариш имкониятлари етарли эканини таъкидлади. Унинг фикрича, келажакда бундай ишлаб чиқариш қувватлари бошқа Европа мамлакатларида ҳам кенгайтирилиши мумкин.

Зеленский шунингдек, Францияда бўлиб ўтган «Катта еттилик» (G7) саммити доирасида АҚШ президенти Доналд Трамп ва давлат котиби Марко Рубио билан музокаралар ўтказганини маълум қилди.

Унинг айтишича, Вашингтон биринчи марта Украинага ракета ишлаб чиқариш бўйича лицензиялар бериш масаласида ижобий муносабат билдирган.

«Биз бу масалада шундай босқичга етдикки, энди фақат Доналд Трампнинг шахсий розилиги талаб этилмоқда. Қолган барча томонлар бу ташаббусни қўллаб-қувватламоқда», — деди Зеленский.

Франциянинг Эвиан шаҳрида бўлиб ўтган G7 саммити якунларига кўра, етакчи давлатлар Украинага ҳаво ҳужумидан мудофаа воситалари, ракета тутувчилар, узоқ масофали қуроллар ва бошқа ҳарбий техника етказиб бериш ҳажмини оширишга келишиб олди.

Шунингдек, «Катта еттилик» мамлакатлари Украина ҳудудида ҳарбий маҳсулотлар ишлаб чиқариш ҳажмини кўпайтириш имконини берувчи лицензияларни тақдим этиш масаласини кўриб чиқишга тайёр эканини билдирди.

Бундан ташқари, G7 давлатлари Украинага келаси қиш мавсумини барқарор ўтказиш учун энергетика соҳасида ёрдам беришни давом эттиришларини маълум қилди.

Маълумот учун, «Катта еттилик» таркибига АҚШ, Германия, Буюк Британия, Франция, Италия, Япония ва Канада киради.