Тошкент халқаро аэропортида йўловчи салкам 22 минг долларни кроссовкасида олиб ўтмоқчи бўлди

«Тошкент халқаро аэропорти» чегара божхона пости инспекторлари хорижга учиб кетаётган фуқаро Г.Ў.ни ўрнатилган тартибда божхона кўригидан ўтказди.

Кўрик натижасида фуқаро томонидан ёзма декларацияланган 6640 АҚШ долларидан ташқари, унинг юкларида жисмоний шахслар томонидан ёзма декларацияланиши лозим бўлган, аммо кроссовка ва чой пакети ичига жойланиб, шу тарзда божхона назоратидан яширилган 21 970 АҚШ доллари борлиги аниқланди.

Ҳолат юзасидан суриштирув ҳаракатлари олиб борилмоқда.

Салкам 1 млрд сўмлик товарларнинг ноқонуний айланмасига чек қўйилди

Тошкент шаҳар божхоначилари пойтахтда фаолият олиб борувчи жамият номига келтирилган контейнердаги 8 турдаги хўжалик молларини белгиланган тартибда божхона назоратидан ўтказди.

Натижада, мазкур контейнерда йўл юк-кузатув ҳужжатларида кўрсатилмаган, қиймати 537 млн сўмлик 3 турдаги товарлар борлиги аниқланди.

Яна бир ҳолатда эса, 4 турдаги велосипед эҳтиёт қисмлари божхона кўригидан ўтказилганда, юк контейнерида йўл-юк кузатув ҳужжатларида кўрсатилганидан ортиқча 4775 дона, қиймати 250 млн сўмлик велосипед шиналари борлиги аниқланди ва ушбу товарларга қўшимча 95,5 млн сўм божхона тўловлари ҳисобланди.

«Чуқурсой» ТИФ божхона пости ходимлари аниқлаган ҳолатда эса МЧЖлардан бирининг номига келтирилган хўжалик товарлари божхона кўригидан ўтказилганда, божхона юк декларациясида ҳамда юк ҳужжатларида кўрсатилганидан ортиқча 118 млн сўмлик 2700 жуфт резина оёқ кийимлар борлиги аниқланди.

Ҳозирда мазкур ҳолатлар юзасидан божхона органлари томонидан суриштирув ҳаракатлари олиб борилмоқда.

344,2 миллион сўмлик божхона тўловларини четлаб ўтишга бўлган уриниш амалга ошмади

Давлат божхона қўмитаси Контрабандага қарши курашиш ва божхона аудити бош бошқармаси Коррупцияга қарши курашиш ва ўз хавфсизлик бошқармаси ходимлари билан ҳамкорликда тезкор тадбир ўтказди.

Ўзбекистондаги МЧЖлардан бирининг номига хориждан олиб келинган қурилиш материалларининг фактура қиймати ҳужжатларда 70 402 АҚШ доллари миқдорида кўрсатилгани божхоначилар эътиборини тортди ва ушбу қийматнинг ҳаққонийлигини текшириш учун хорижий давлатга сўровнома юборилди.

Сўровнома натижасига кўра, қурилиш материалларининг умумий фактура қиймати 207 352 АҚШ доллари экани маълум бўлди.

Тафовутлар натижасида 344,2 миллион сўм қўшимча божхона тўловлари ҳисобланди.

Ҳолат юзасидан божхона органлари томонидан терговга қадар текширув ҳаракатлари давом эттирилмоқда.