Ливияда янги ягона ҳукумат шакллантирилди

Ҳукумат таркибини маъқуллаш учун парламентдаги депутатларнинг 50 фоиз овози ва яна бир овоз етарли бўлган. Натижада йиғилишда иштирок этган 134 депутатдан 132 нафари янги ҳукуматга овоз берган, 2 депутат бетарафлик билдирган. Йиғилишда 36 депутат иштирок этмаган.

Парламент спикери Оқил Солиҳ Исонинг маълум қилишича, янги вазирлар маҳкамаси 2021 йил 24 декабргача фаолият кўрсатади. Шу куни Ливияда президент ва парламент сайловлари бўлиб ўтиши белгиланган.

Дибайба ҳукуматнинг таркиби тасдиқланишини “тарихий он” деб атади.  

“Мен мамлакатдаги парчаланишга чек қўйишга чақираман ва миллий ярашувга эришиш устида ишлашга ваъда бераман. Ливия бирдам ва ажралмас бўлиши лозим. Бирдамлик ватанимизга хавфсизлик келтиради, уруш бошқа такрорланмаслиги керак”, деб айтган Дибайба. У мамлакат ҳудудлари ўртасида ўз ихтиёрича ўрнатилган чегаралар батамом йўқ қилиниши кераклигини қўшимча қилган.

Дибайба ҳукумати 27 вазир, 6 давлат вазири ва 2 нафар бош вазир ўринбосаридан ташкил топган. 

Янги ҳукуматнинг шакллантирилиши Ливиядаги намойишлар бошланишининг ўн йиллигига тўғри келди. Ўшандаги воқеалар мамлакатнинг кўп йиллик етакчиси Муаммар Қаззофий тузумининг ағдарилиши, фуқаролик уруши ва давлатнинг парчаланишига олиб келган. Шундан кейин мамлакатда қўш ҳокимлик – ғарбда - пойтахт Триполида халқаро тан олинган Миллий келишув ҳукумати, шарқда эса фелдмаршал Ҳалифа Хафтар бошчилигидаги Ливия миллий армияси юзага келган.