АҚШда супермаркетдаги отишмада 10 киши ҳалок бўлди

АҚШнинг Боулдер шаҳридаги (Колорадо штати) King Soopers супермаркетида юз берган отишма оқибатида 10 киши, жумладан бир полициячи ҳалок бўлди.  

Полициянинг хабар беришича, номаълум эркак дастлаб супермаркет олдида отишма бошлаган, сўнгра уни дўкон ичида давом эттирган. Чақириққа биринчи бўлиб етиб келган 51 ёшли полициячи Эрик Тэлли отишма қурбонига айланган.

Жиноятчи полиция билан отишма вақтида яраланган ва қўлга олинган. Унинг шахси ошкор қилинмаган.

Тергов жиноятчининг мотивларини ва шериклари бўлгани ёки йўқлигини ҳамда ҳужум вақтида қандай қуролдан фойдаланганини аниқлаши керак бўлади. 

Воқеа ҳақида АҚШ президенти Жо Байден хабардор қилинган. Оқ уй матбуот котиби Жен Псакининг таъкидлашича, Оқ уй жамоаси президентни воқеа тафсилотларидан хабардор қилиб туради. 

17 март куни ҳам АҚШнинг Жоржия штатида учта массаж салонига ҳужум қилиниши оқибатида 7 киши ҳалок бўлганди. Биринчи ҳужум Чероки округида, қолган иккитаси 50 км олисда жойлашган Атлантада содир этилган. Черокидаги отишмада 3 киши, Атлантадаги отишмада эса 4 аёл ҳалок бўлган. Полиция Черокидаги отишмада гумон қилиб 21 ёшли Роберт Аарон Лонгни ҳибсга олган. Бироқ ҳозирда ушбу ҳужумлар орасида боғлиқлик борлиги аниқланмаган.