Сирдарё вилояти Янгиер шаҳрида мактаб биносини қуришда 149 миллион сўм бюджет маблағлари талон-торож қилинган. Бу ҳақда Бош прокуратура ҳузуридаги Иқтисодий жиноятларга қарши курашиш департаменти маълум қилмоқда.
Қайд этилишича, Бош прокуратура ҳузуридаги департаментнинг Боёвут туман бўлими томонидан ўтказилган терговга қадар текширувда, «B.B.» МЧЖ томонидан Янгиер шаҳридаги умумий ўрта таълим мактаби биносини қуришда амалда бажарилмаган 149 млн сўмлик ишларни ҳужжатларга қўшиб ёзиш орқали бюджет маблағлари талон-торож қилингани аниқланган.
Таъкидланишича, мазкур ҳолат юзасидан жамият раҳбари И.Р. ва бошқаларга нисбатан Жиноят кодексининг 167-моддаси (талон-торож қилиш) билан жиноят иши қўзғатилиб, ҳозирда тергов ҳаракатлари олиб борилмоқда.
