Талон-торож ва фирибгарлик учун шартли озодликка чиқиш тартиби ўзгарди

Ўзбекистонда талон-торож ва фирибгарлик жиноятлари учун ҳукм қилинган шахсларга нисбатан жазодан муддатидан илгари шартли равишда озод қилиш тартиби қатъийлаштирилди. Энди улар етказилган зарарни тўлиқ қопламаган тақдирда мазкур имтиёздан фойдалана олмайди.

Президент томонидан имзоланган қонун билан Жиноят кодекси ва бошқа қонун ҳужжатларига қўшимча ҳамда ўзгартиришлар киритилди.

Қонунга мувофиқ, ўзлаштириш ёки растрата қилиш йўли билан талон-торож қилиш, шунингдек фирибгарлик жиноятлари учун ҳукм қилинган шахсларга жазодан муддатидан илгари шартли равишда озод қилиш тартиби қайта кўриб чиқилди.

Унга кўра, содир этилган жиноят оқибатида етказилган моддий зарарнинг ўрни тўлиқ қопланмаган бўлса, маҳкум шартли озодликка чиқарилмайди.

Шу билан бирга, қонун билан коррупцияга оид жиноятларнинг аниқ рўйхати ҳам белгиланди. Шунингдек, давлат органлари ва ташкилотларида комплаенс ҳамда коррупцияга қарши ички назорат тузилмаларини ташкил этиш, ҳудудларда коррупцияга қарши курашиш кенгашларини шакллантириш назарда тутилган.

Мазкур қонун расмий эълон қилинган кундан бошлаб кучга кирди.