Меркел бир кун илгари жорий этилган карантинни бекор қилди ва аҳолидан узр сўради

Германия канцлери Ангела Меркел Пасха байрами кунларига жорий этилган карантин учун фуқаролардан узр сўради ва уни бекор қилди. Бу ҳақда Deutsche Welle хабар бермоқда.

Меркел  «яхши мақсадда» — коронавируснинг учинчи тўлқини тарқалишини секинлаштириш учун Пасха кунларига карантин эълон қилингани, аммо бу нотўғри қарор бўлганини айтди.

“Бу фақат менинг хатом, бунинг учун мен жавобгарман”, – деб таъкидлади у ва барча фуқаролардан узр сўради.

 Меркел 22 март куни мамлакатда карантин режими 18 апрелгача узайтирилганини эълон қилганди. Пасха даврида — 1 апрелдан 5 апрелгача эса карантин режими янада кучайтирилиши кўзда тутилганди.

Роберт Коҳ номидаги институт берган маълумотларга кўра, Германияда коронавирус юқтирганлар сони 2,7 миллион нафарга етган, 75 минг нафарга яқин киши вафот этган.