Патрушев АҚШни Россиянинг «оғир кунлари» учун жавоб бериши тўғрисида огоҳлантирди

Жейк Салливан АҚШнинг Россия билан яқин келажакдаги муносабатлари оддий бўлмаслигини ва айрим масалаларда жиддий келишмовчиликлар борлиги сабабли олдинда «оғир кунлар» турганини айтганди.

Фото: РИА Новости

Агар Вашингтон Москва учун «оғир кунлар» пайдо қиладиган бўлса, Америка томони бунинг учун жавоб беради, деди Россия хавфсизлик кенгаши котиби Николай Патрушев. У АҚШ президентининг миллий хавфсизлик бўйича маслаҳатчиси Жейк Салливаннинг икки томонлама муносабатлар келажаги тўғрисидаги баёнотини ана шундай изоҳлади.

«Олдиндан айтишяптими, демак, режалаштиришяпти. Режалаштиришяптими, амалга оширишлари ҳам мумкин. Лекин унда қилган ишлари учун жавоб беришади», — деди Патрушев.

У Россия АҚШга нисбатан ҳеч қандай душманлик ҳаракати қилмагани ва бундан кейин ҳам қилмоқчи эмаслигини айтди.

Салливан 22 март куни АҚШнинг Россия билан яқин келажакдаги муносабатлари оддий бўлмаслигини ва айрим масалаларда жиддий келишмовчиликлар борлиги сабабли олдинда «оғир кунлар» турганини айтганди.

Шу билан бирга, Америка маъмурияти Москва ва Вашингтон ядро қуроллари устидан назорат каби муҳим йўналишларда ҳамкорлик қилиши мумкин, деб ҳисобламоқда.