Эрон делегацияси Венада АҚШ билан музокаралар ўтказишдан бош тортди

Эрон делегацияси Биргаликдаги ҳаракатлар режаси бўйича комиссиянинг 6 апрелда Венада ўтадиган йиғилишида АҚШ вакиллари билан на тўғридан тўғри, на воситачилар иштирокида музокаралар ўтказади. Эрон унга қарши киритилган санкциялар бекор қилинмагунча, АҚШ билан ҳар қандай музокаралардан бош тортмоқда.

Foto: Eron Tashqi ishlar vazirligi

Эроннинг Press TV телеканали манбага таяниб хабар беришича, Теҳрон Вашингтон томонидан санкцияларнинг босқичма-босқич бекор қилиниши бўйича таклифларни қабул қилмайди.

Аввалроқ АҚШ давлат департаменти АҚШ делегацияси Венадаги йиғилишда иштирок этишини тасдиқлаганди. Давлат департаментининг баёнотида таъкидланишича, Вашингтон Эрон масаласи “дарҳол ечим топмаслигини”, чунки олдинда ҳали “мураккаб мунозаралар” борлигини айтган.

2 апрелда Эрон ядро дастури бўйича Биргаликдаги ҳаракатлар режаси иштирокчи давлатлари – Хитой, Франция, Германия, Россия, Британия АҚШнинг келишувга қайтишида кўмак кўрсатмоқчи эканини маълум қилган.

Венада 6 апрелда ўтадиган йиғилишда ядро келишувининг иккита муҳим жиҳати – Эронга қарши санкцияларнинг бекор қилиниши жараёни ва Теҳрон томондан келишув бўйича мажбуриятларнинг бажарилиши масалалари муҳокама қилинмоқчи.

Вашингтоннинг ҳаракатлар режаси бўйича позицияси шундан иборатки, Теҳрон келишув доирасида ҳамкорлик қилишга тайёрлигини намойиш қилиши лозим. Аввалроқ АҚШ давлат департаменти вакили Нед Прайс Теҳрон келишув шартларига амал қилса, Вашингтон ҳам бунга қайтишга тайёрлигини маълум қилган. Унинг айтишича, АҚШ Эрон билан европалик ҳамкорлар ёрдамида мулоқот қилишга тайёр.

Эрон ядро дастури бўйича Биргаликдаги ҳаракатлар режаси 2015 йилда тузилган. У Эрон ўз ядро дастурини чеклаши эвазига Теҳрондан санкциялар олинишини кўзда тутган. Бироқ 2018 йил АҚШ ушбу келишувдан чиққан ва Теҳронга қарши санкцияларни тиклаган. Ўз навбатида, Эрон 2019 йилда келишув доирасидаги мажбуриятларини қисқартиришини айтган.