«Сават тўқишни 3 кунда ўрганиб олса бўлади» — косонсойлик ҳунармандлар оиласида

Косонсойлик Азимовлар оиласи 24 йилдан бери сават тўқийди. Оила бекаси Соҳиба Каримова бу ҳунарни қайин оғасидан ўрганган.

Ҳунарманднинг айтишича, саватлар деворгул новдаларидан тўқилади. Дастлаб новдалар катта қозонда 2 соат қайнатиб пишириб олинади. Кейин пўсти олиниб, тўқиш учун ҳозирланади.

«Келин-қизларим билан бирга 20 турга яқин сават тўқиймиз, асосий даромадимиз ҳам шу ҳунар ортидан келади. Бир боғ новдадан ўртача 2-3 та сават тайёрланади. Катта саватлардан бир кунда 10 та ҳам тўқиймиз, кичкиналарини 20 та, 30 та тўқиймиз», – дейди у.

Соҳиба опа 100 га яқин шогирд чиқарган. Маҳалладошларидан кўпи шу ҳунарни эгаллаган.

«Астойдил қунт қилган одам 3 кунда ҳам ўрганиб олиши мумкин, зеҳнига қараб. Келинларим менинг тўқишимга қараб ўрганиб олган», – дейди Соҳиби опа.