Коронавирус рақамларда: 91 давлат Хитойни ортда қолдирган, Америкада олинган тестлар сони аҳоли сонидан ортиқ, Исроил вакцинацияда етакчи

6 апрел ҳолатига кўра дунё бўйлаб коронавирус юқтирганлар сони 133,3 миллиондан ошди. Бу маълумот дунё бўйлаб турли статистикаларни юритиб борувчи Worldometers порталида эълон қилинган. Айнан шу сайт маълумотларига кўра, айни дамдаги коронавирусга боғлиқ асосий рақамларга эътибор берамиз.

Бугунги кунга қадар дунё бўйлаб 2 миллион 891 мингдан ортиқ киши коронавирус қурбонига айланди. Афсуски, сиз бу маълумотларни ўқиётган вақтда уларнинг сони кўпайган. 107 миллиондан ошиқ одам вирусдан тузалди. Айни дамда 23 миллиондан ортиқ одам вирус билан олишмоқда. Уларнинг 99,6 фоизи ўртача ҳолатда бўлса, фақатгина 0,4 фоизи оғир ёки ўта оғир ҳолатда.

Энг кўп касалланиш ҳолати ҳамон АҚШда бўлиб турибди. 31,5 миллиондан ортиқ америкалик пандемия бошидан буён коронавирус юқтиришга улгурди. Улардан 570 мингдан ортиғи вафот этди. Бразилия вирус юқтирганлар сони бўйича иккинчи ўринда. 13,1 миллиондан ортиқ бразилиялик вирус юқтирган. 12,9 миллион фуқароси вирус юқтирган Ҳиндистон бу борада учинчи ўринда.

Сўнгги вақтларда кунлик ўсиш айнан шу мамлакатда юқори бўлмоқда. Масалан, 5 апрел куни 96 мингдан ортиқ, 6 апрел куни 115 мингдан ортиқ янги ҳолат қайд этилди.

Кунлик ўлимлар сони Бразилияда тинимсиз кўпаймоқда. Март ойи мамлакатда энг кўп ўлим қайд этилган давр бўлди. Бу ой давомида мамлакатда 8 марта кунлик ўлим рекорди янгиланди. Энг юқори кунлик ўлим кўрсаткичи 3,9 мингтагача кўтарилди. 2021 йил март ойида Бразилияда 14 мингдан ортиқ одам вафот этган ва уларнинг аксарини коронавирус «олиб кетган». Бу ўтган йил мартига қараганда уч баравар кўп дегани. Пандемия бошидан буён 337 мингдан ортиқ бразилиялик коронавирус сабаб вафот этган.

«Юқори ўнлик»да энг тез юқорилаётган давлат Туркия бўлиб турибди. Апрел бошидан буён мамлакатда кунлик коронавирус юқтириш ҳолати 40 мингдан камайгани йўқ. Шунингдек, Франция, Италия, Колумбия, Эрон, Аргентинада ҳам кунлик ўсиш юқори бўлиб турибди. Вакцинация жараёни жадал давом этаётган бўлса-да, Европада ўсиш яна тезлашди. Умумий ҳисобда ҳозиргача 14та давлатда вирус юқтирганлар сони 2 миллиондан, 23 мамлакатда миллиондан ортиқ.

Коронавирус илк марта аниқланган Хитой вирус юқтирганлар сони бўйича 100таликдан чиқиб кетишга яқин турибди. Ҳозиргача 91та давлат Хитойни ортда қолдиришга улгурди. Хитойдан кейин Қирғизистон, Замбия ва Ўзбекистон турибди.

Аҳолидан тест олишда Америка ақл бовар қилмас кўрсаткич қайд этмоқда. Ҳозиргача америкаликлардан 412 миллиондан ошиқ тест олинган. Маълумот учун, АҚШ аҳолиси 333 миллионга яқин. Яъни кўпчилик бир неча мартадан тест тпширгани ҳисобига натижа мана шундай катталашиб кетган. Ҳиндистон 251 миллион, Хитой 160 миллион, Британия 132 миллион (фуқароларининг икки бараварига тенг миқдорда), Россия 122 миллион тест ўтказган.

Вакцинация борасида Исроил етакчи бўлиб турибди. 5 апрел ҳолатига кўра 5,2 миллиондан ортиқ исроилликлар биринчи дозани, 4,8 миллион исроиллик эса вакцинанинг иккинчи дозасини қабул қилиб бўлди. Маълумот учун, мамлакат аҳолиси 10,1 миллион кишини ташкил этади. Яъни мамлакат аҳолисининг 52 фоизи коронавирусга қарши 100 фоиз эмланган бўлса, 16 ёшдан катта аҳолининг 79 фоизи вакцина олган.

Исроилда вакцина бепул қилинмоқда ва навбатда телефон орқали онлайн ёзилиш мумкин. Вакцинага ёшга қараб навбатга ёзиш тизими жорий қилинган. Ёши катталар олдинроқ эмланган. Исроилликлар Pfizer вакцинасини қабул қилмоқда ва у 12 ёшдан катталар учун 100 фоиз таъсирли экани исботланган.

ЖCCТ маълумотига кўра, ҳозиргача 678 миллионта вакцина ишлаб чиқарилган. Вакцина олганлар сони бўйича ҳам АҚШ етакчи. Ҳозиргача 62 миллиондан ортиқ америкалик тўлиқ вакцина олган. Бу мамлакат аҳолисининг деярли 19 фоизи дегани. Ўтган бир кун давомида 2,1 миллион америкалик вакцина олган. Ҳозиргача Америкада 167 миллион доза вакцина ишлаб чиқарилгани маълум. Ҳиндистонда 10,8 миллион киши, Туркияда 7,1 миллион киши, Британияда 5,4 миллион киши, бутун дунёда эса 146 миллион киши вакцина қабул қилган.