Туркияда 3 кунлик комендантлик соати жорий қилинади

Туркияда коронавирусга чалинганлар сони кескин ошиб кетгани сабабли бутун мамлакат бўйлаб 3 кунга — 23–26 апрел кунлари кун бўйи амал қиладиган комендантлик соати киритилмоқда.

Фото: AFP

«23 апрел давлат байрами — Миллий мустақиллик ва болалар куни бўлгани сабабли жорий ҳафтада кўчага чиқишга чеклов 22 апрел соат 19дан бошланиб, 26 апрел соат 5да тугайди», деб маълум қилинган хабарда.

3 кунлик комендантлик соати вақтида Туркия фуқаролари ўз уйларини соат 10дан 17гача фақат озиқ-овқат дўконлари ва дорихонага, шифокор ҳузурига бориш ва итларини сайр қилдириш учун тарк эта оладилар.

Аввалроқ Туркия соғлиқни сақлаш вазири Фахритдин Хўжа Туркияда рекорд сонда кунлик касалланиш ҳолатлари қайд этилаётгани сабабли мамлакат пандемия бошидан бери энг мураккаб даврни бошдан кечираётганини айтганди.

Айни вақтда Туркиянинг 81та вилоятидан 58тасида иш кунлари соат 19дан 5гача ҳамда дам олиш кунлари жума соат 21дан душанба соат 5гача комендантлик соати амал қилмоқда.