Бензема «Реал» учун янги Роналду. Фақат у мадридликларни финалга олиб чиқиши мумкин

Клубда Криштиану Роналду даражасидаги юлдуз бўлса, раҳбарлар у кетганидан кейин нима бўлиши ҳақида ўйлаши керак. Аниқроғи — ундан кейин жамоанинг янги юзи ким бўлиши ҳақида. «Реал»да ҳам бу савол берилгани аниқ, аммо ҳеч ким португалиялик юлдуз билан хайрлашув бу қадар тез суръатда ва барвақт бўлишини кутмаганди.

Аввалига кўпчилик унинг ўрнини Винисиус Жуниор эгаллашини кутганди ва бу мантиқий ҳам эди - у 17 ёшида катта пулга сотиб олинганди. Кейин эса «Сантьяго Бернабеу»нинг янги етакчиси бўлишига умид боғланиб, Эден Азар сотиб олинди ҳамда унга «Қироллик клуби» учун катта аҳамиятга эга бўлган еттинчи рақам топширилди. Аммо бельгиялик футболчи доимий тарзда жароҳат олиб келмоқда, Винисиус эса ҳали ҳам ўтиш давридан ўта олмаяпти.

«Реал» учун булар қай даражада муаммо, аммо энг асосийси эмас. Чунки Мадридда янги қирол пайдо бўлди. Пайдо бўлди дейиш ўз маъносида эмас. Карим Бензема жамоада 12-мавсумни ўтказмоқда. Мадридда мураббийлар алмашади, авлодлар алмашади, аммо француз футболчиси ўйнашда давом этади, у Раул билан бирга ўйнашга улгурган, у сешанба оқшомида Чемпионлар лигасида урилган голлар сони бўйича ушбу афсона билан тенглашиб олди. Бу ўйиндаги гол Карим учун ЕЧЛдаги 71-гол бўлди. Юқорида фақат Роналду (134), Лео Месси (119) ва Роберт Левандовски (73).

Бензема ЕЧЛ плей-офф ўйинларида 20 гол урган – у бу борада Мюллер (24), Левандовски (26), Месси (49) ва Криштиану (67) каби футболчиларни таъқиб қилмоқда.

Яна бир нюанс ҳам бор — асосий еврокубокдаги голларининг барчасини Бензема ўйиндан урган ва бу 33 ёшли ҳужумчининг уникаллиги ҳақидаги яна бир факт.

Француз ЕЧЛдаги ажойиб ўйини билан чекланмайди, у Испания чемпионатида ҳам зўр ўйнамоқда –  Ла Лиге-2020/21 ўйинларида ундан кўп голни фақат Месси урган (25га қарши 21). У 7 ассистга ҳам муаллифлик қилган: Бензема «Реал»нинг Ла Лигадаги жами голларининг ярмида иштирок этган.

Ҳозирда бир вақтлар Флорентино Перес уни сотиб юбормоқчи бўлганига ишониш қийин. Бу кўнглига келадиганини қилаверадиган, катта номларга ўч «Реал» президенти учун одатий ҳолат. Масалан, уни жамоа қаторасига уч мавсумда ЕЧЛ ғолиб бўлишига катта ҳисса қўшган коста-рикалик Кейлор Навас ҳам қониқтирмаганди.

Ҳар сафар Зинедин Зидан ушбу дарвозабонни жамоада олиб қолар эди, аммо мураббий кетганидан кейин Перес «азалий орзуси»ни амалга оширди ва Тибо Куртуани сотиб олди. Бельгиялик дарвозабон сўнгги икки мавсумда чиндан ҳам яхши ўйнамоқда, аммо буни Наваснинг «ПСЖ»даги ўйинлари билан тенглаштириб бўлмайди. Савол туғилади: Таркибда юқори даражадаги дарвозабон бўла туриб, унинг ўйинида ҳеч қандай муаммо йўқлигида янги дарвозабон учун 40 миллион евро сарфлаш ва трансфер доирасида «Челси»га Матео Ковачични бериб юборишда мантиқ борми?

Жамоанинг бахтига, Бензема билан вазият бошқача тус олди, энди Перес «Лион»дан форвард сотиб олиб, энг тўғри қарорларидан бирини амалга оширган бўлиб чиқмоқда. Ўшанда «Реал»да бутунлай бошқа футболчи биринчи рақамли мақсад эди, аммо «Валенсия» Давид Вильяни сотишни истамаганди. Ўша вақтда жаҳон футболи юлдузларидан бири бўлган испаниялик ҳужумчи «Реал»нинг янги француз ҳужумчисидан олти ёш катта эди. «Валенсия» бир йил ўтиб, 2010 йилда Вильяни «Барселона»га сотади, 2013 йилда эса футболчи испан футболининг бошқа бир гранди - «Атлетико» сафига ўтади. Аммо Мадридда бир йил ўйнаб, океан ортига, МЛС чемпионатига йўл олади. Орада Австралияда ҳам ўйнаган футболчи фаолиятининг сўнгги қисмини Японияда, J-лигасида ўтказди ва бир йил олдин футболчилик фаолиятини якунлади, Бензема эса ҳамон катта футболда.

Роналду даврида ҳам яхши статистикага эга бўлган бўлса-да, француз форварди барибир «Олтин тўп»нинг беш карра соҳиби соясида қоларди, ҳозир эса у шаксиз «Реал»нинг примаси. У Чемпионлар лигасида сўнгги уч мавсумда Криштианудан кўпроқ гол урган — 15 гол 14тага қарши. Португалиялик футболчи кетганидан кейин айнан Бензема мадридликлар жамоасида барча турнирлар доирасида урилган голлар сони бўйича ҳам (85), голли узатмалар сони бўйича ҳам (29) биринчи.

Бу рақамлар француз футболчисининг буюклигини таъкидлайди, аммо, афтидан, унинг қаймоқранглилар сафидаги ролини тўлиқ очиб бера олмайди. Бензема турлича ўйнаши мумкин, у ўз вақтида Роналду учун идеал шерик бўлиб, ҳимоячиларни ўзига жалб қилган ҳолда португалиялик учун ҳудудларни тозалаган, бу давр унинг имкониятларини ривожлантирган.

У доимий равишда ортга қайтиши — шунчаки тўп излаб ортга қайтиш эмас, у ҳужумни чуқурдан бошлашда иштирок этиб, бир неча сония ичида рақиб жарима майдони ичида пайдо бўлиши ёки жамоадошларидан бирини зарба бериш нуқтасига чиқариши мумкин. Замонавий футболда у каби интенсив, қора ишларни қилишдан қайтмайдиган ва прессингда фаол иштирок этадиган футболчилардан фақат Каванини Бензема билан таққослаш мумкин.

«У янада серқирра футболчига айланди, у энди шунчаки «тўққизлик» эмас. Карим фақат ўзи гол уриши ҳақида ўйламайди ва шунинг учун уни ёқтираман. У жамоадошлари билан комбинациялар уюштиради ва улар учун қулай вазиятлар яратиб беради, жамоага гол керак бўлганида ўзи катта саҳнага чиқиб керакли голларни уради», дея тасдиқлайди Зидан.

Зизунинг бу сўзлари қарийб тўрт ой олдин айтилган, аммо «Челси»га қарши ўйиндан кейин бу сўзлар яна долзарблашди. Лондонликлар яхши ўйнашди ва ўйиндаги қаҳрамонлардан бири сифатида шу куни майдон марказини назорат қилган Нголо Кантени айтиш мумкин, «Реал» эса фақат бир бор рақиб дарвозаси томон аниқ зарба берди. Аммо бу қандай зарба эди!? Ҳаводаги тўпни бош билан қайта ишлаб унга қайтариб бўлмас зарба бериш — бу юқори савия белгиси. Бир ҳафтадан кейин «Стэмфорд Бриж»да қаймоқранглиларни финалга олиб чиқиши мумкин бўлган футболчи - бу фақат Бенземадир.

Манба: Спорт-Экспресс