«Реал» жиддий қайта қуриш даврига кирмоқда

«Реал» – лигаларда мавсум якунланиб, жаҳон чемпионати бошлангунига қадар бўлган оралиқдаги асосий нюсмейкер бўлиб турибди. Мадриддагилар президентлик сайловлари арафасида туришибди. Флорентино Перес ва Энрике Рикелме шов-шувли баёнотлар ва катта ваъдалар орқали сайловчилар овози учун курашишмоқда. Перес – фаворит. Аммо сайловлар ҳали бўлиб ўтмади – демак, ҳозирдан Флорентино президентликда қолишини аниқ айтиб бўлмайди. Бунинг эҳтимоли юқори, аммо ҳали барчаси ҳал бўлмаган.

Агар Перес лавозимида қоладиган бўлса, Жозе Моуриниони Мадридга қайтаришини айтган. Бунинг учун «Бенфика» клубига 15 млн евро миқдорида товон пули ҳам тўлаб берилади.

Рикелме эса агар сайловларда ғалаба қозонадиган бўлса, «Реал»га жамоа мухлислари хоҳлайдиган суперюлдуз мақомидаги мураббийни олиб келишини айтган. У бу орқали катта эҳтимол билан Юрген Клоппни назарда тутмоқда.

Переснинг рақиби «Реал»га икки нафар суперюлдуз футболчи олиб келишини, улардан бири Эрлинг Ҳоланд бўлишини айтиб, муаммога ҳам учради – бунинг учун «Манчестер Сити» уни судга бермоқчи.

Переснинг ўзининг режалари эса реалроқ. Қуйида у режалаштирган трансферлар ҳақида.

Марказий ҳимоядаги муаммолар

79 ёшли функционер барчасини ҳимоя чизиғидан бошламоқда: жамоа марказий ҳимояси вакиллари бўлган Антонио Рюдигер ва Эдер Милитао сўнгги йилларда кўп жароҳат олмоқда: бразилиялик ҳимоячи кетма-кет иккинчи бор хочсимон пайлари узилиши туфайли узоқ муддатга сафдан чиққан ва футболчилик фаолиятини якунлаши мумкин, германиялик ҳимоячи эса аллақачон 33 ёшда. Марказий ҳимоянинг яна бир вакили, Мадридда ишлари юришмаган Давид Алаба эса шу ёзда шартномаси муддати тугаб, жамоани тарк этди. Шунингдек, жамоанинг кўп йиллик сардори, ўнг қанот ҳимоячиси Дани Карваҳал ҳам кетди.

Перес бир йил муқаддам «Ливерпул»нинг асосий футболчиларидан бири Трент Александр-Арнолдни эркин агент сифатида Мадридга олиб келганди. Энди у бу трюкни такрорламоқчи.

31 май куни мерсисайдликлар жамоаси Ибраима Конате кетаётганини эълон қилди: француз ҳимоячи муддати тугаётган шартномасини узайтиришдан бош тортган. У фаолиятини қаерда давом эттириши аллақачон маълум бўлиб улгурди.

Инсайдерларга кўра, Конатенинг ўзига катта миқдорда (20 млн евро) кўтарма пули берилади ва у билан 22,5 млн евро миқдоридаги йиллик маошни кўзда тутувчи тўрт йиллик шартнома тузилади.

27 ёшли футболчи ўтган мавсумни кучли ўтказа олмади – лекин бу мавсум бутун Ливерпул» учун яхши ўтмади. Лекин у топ-даражада футбол ўйнаш бўйича катта тажрибага эга. Конате – атлет, бақувват ва яхши кураша олади. Бўйи 194 см, шунинг учун иккинчи қаватда ҳам ўзини қулай ҳис қилади. Улкан гавдасига қарамай, тезлиги ҳам яхши.

Шу билан бирга, Конате «етакчи» ҳимоячи эмас. «Ливерпул»да мудофаа чизиғини у эмас, Виржийл ван Дейк бошқарган. Услуб жиҳатдан нидерландиялик ва француз футболчилари бир-бирини жуда яхши тўлдиришарди: бири ақлий, иккинчиси – жисмоний ишларни ўз зиммасига олган.

«Реал»да ким «етакчи» марказий ҳимоячи бўлади? Юқорида айтилганидек, Рюдигер ва Милитао энди бунга ярамайди. Рюдигер якунланган мавсумдаги 56 ўйиндан фақат 26 тасида қатнашди, ундан олдинги мавсумнинг охирги қисмини ҳам жароҳат туфайли ўтказиб юборганди. Бу йилги жаҳон чемпионатидан кейин у юқори спорт формасида бўлиши қийин. Милитао эса фақат октябрда сафга қайтиши мумкин, аммо яна қанча вақт жароҳатсиз ўйнай олиши номаълум.

Дин Ҳаусен номинал ҳимоячи ҳисобланса-да, унинг асосий скилли – тўп билан ўйин. Унинг паслари ажойиб, тўп билан олдинга бора олади, аммо ҳимояланишда унга саволлар бор. Унинг ўзини доим кимдир суғурталаб туриши талаб этилади. 

Марказий ҳимоянинг яна бир вакили Раул Асенсио Карло Анчелотти даврида порлаганди, аммо у кетганидан кейин деярли ўйнамай қўйди, мажбуран туширилган ўйинларида эса ишончни оқлай олмади. Энди у шу ёзда жамоадан кетиш учун асосий номзодлар қаторида.

ОАВдаги хабарларга ишонилса, Перес марказий ҳимояга Конатедан ташқари Йошко Гвардиолни ҳам олиб келиши мумкин. Хорватиялик ҳимоячи мавсумнинг катта қисмида жароҳат туфайли ўйнай олмади, аммо у ҳозир яхши формада – у доим элита даражадаги ва ўта универсал ҳимоячи бўлиб келган. У Хосеп Гвардиола қўли остида янада такомиллашди, устози «Манчестер Сити»ни тарк этганидан кейин у ҳам бошқа клубга ўтиш ҳақида ўйлаб кўриши мумкин. 

Қанот ҳимояси

Александр-Арнолднинг ўтган йилги трансферини омадли дейиш қийин: инглиз футболчиси ўтган мавсумнинг кўп қисмини лазаретда ўтказди, ўйнаш имконига эга бўлганида эса у қадар ишончли кўринмади. Шунинг учун ёзда «Реал» ўнг қанот ҳимоясини ҳам мустаҳкамламоқчи.

The Athletic нашри Перес «Интер» футболчиси Дензел Думфрисни кўз остига олганини хабар қилган. Флорентино ушбу футболчини жамоага олиб келиш учун нерадзуррилар билан музокара ўтказиши ҳам шарт эмас: нидерландиялик футболчининг шартномасида товон пули кўрсатилган. Инсайдер Фабрицио Романога кўра, ушбу қанот ҳимоячисини 20 миллион евро эвазига сотиб олиш мумкин.

Думфриснинг ўзи Испания пойтахти жамоасида ўйнашни хоҳлаши, унинг агентлари билан аллақачон шартнома бўйича музокаралар олиб борилаётгани хабар қилинган.

Энди «Реал»да бир-бирига умуман ўхшамайдиган икки нафар ўнг қанот ҳимоячиси бўлади. Трент классик латерал эмас. У кўпроқ қанотдан марказга кўчиб, ўйинни бошқаришга уринади. Думфрис – унинг буткул акси. У классик қанот футболчиси – тезкор, кучли ва яхши кросс узатмаларга эга. Қолаверса, нидерландиялик футболчи – якунлашда ҳам моҳир. У «Интер» сафидаги 207 ўйинда 27 гол урган. Унинг позициясидаги (у стандарт вазиятлар ижрочиси эмас) футболчи учун бу жуда юқори кўрсаткич.

Шу билан бирга, «Интер»да Дензел уч марказий ҳимоячидан иборат схемада латерал сифатида ўйнаган. «Реал» эса, катта эҳтимол билан, 4-4-2 схемасида (марказий ҳимоячилар сони уч эмас, икки нафар бўлади) ҳаракат қилади. Думфрисда бундай схемада ўйнаш тажрибаси бор – масалан, Нидерландия миллий жамоасида. Аммо, шу омил туфайли Мадридда ундан «Интер»даги каби сермаҳсуллик кутиш ўринли бўлмайди.

Дензел 30 ёшда. У «ҳозир ва шу ерда» натижа кўрсатадиган футболчи. Бундай футболчи учун бугунги кунда 20 млн евро – жуда оз. «Реал» ҳозирги ўлчовлардаги камтарона маблағ эвазига юқори савияли тайёр футболчи олмоқда.

Шу тариқа, мадридликлар мудофаасининг ўнг қанотида ранг-баранглик бўлади. Бу позициянинг якка эгаси бўлмаслиги аниқ. Мураббий муайян рақибдан келиб чиққан ҳолда кимни туширишни ҳал қилади. «Реал» чап қанотда ҳам шундай хилма-хилликка эга бўлишни хоҳлаши тайин. «Арсенал» ҳимоячиси Риккардо Калафиорига билдирилаётган қизиқиш шу билан изоҳланади.

Италиялик ушбу футболчи ҳам ноодатий қанот ҳимоячиси ҳисобланади. У ҳам жамоаси ҳужум қилаётганида Трент каби марказга ўтиб, қўшимча вариантлар таклиф қилиши мумкин. Унда паслар аниқлиги юқори, зарбалари яхши, рақиб жарима майдонига кириб бора олади, голлар уради. Ҳозир нафақат «Реал»да, балки бошқа кўплаб катта клубларда ҳам бундай қанот ҳимоячиси йўқ. «Реал»да ҳозир чап қанотдаги асосий ҳимоячи Алваро Каррерас классик латерал. Шунингдек, мунтазам жароҳат оладиган Ферлан Менди ва жамоадаги барча мураббийлар даврида захира ўриндиғида қолаётган Фран Гарсия бор.

Переснинг 150 миллионлик ваъдаси

4 июн куни Перес Энрике Рикелменинг «Манчестер Сити»дан Эрлинг Ҳоланд ва Родрини олиб келиш ҳақидаги шов-шувли баёнотларига жавобан юришини амалга оширди: у Horizonte дастури эфирида бу ёзда клуб учун рекорд миқдордаги трансфер амалга ошириш режасини айтди. Ҳозирда «Реал» тарихидаги энг қимматбаҳо трансфер қарийб уч йил муқаддам Дортмунднинг «Боруссия» клубидан 127 миллион еврога сотиб олинган Жуд Беллингҳэм бўлиб турибди.

«Сешанба куни мен Чемпионлар лигасида ўйновчи клубнинг суперюлдуз футболчиси учун таклиф билан чиқаман. Биз 150 миллион евро тўлашга тайёрмиз. Мен «Реал» тарихидаги энг қимматбаҳо футболчи билан шартнома имзолашга уриниб кўраман», – деди у.

Президент фанатларга бир неча белгилар қолдирган. Хусусан, гап АПЛ футболчиси ҳақида кетмаётганини билдирган: шу туфайли Ҳоланд ва Жереми Доку варианти истисно қилинди. Шунингдек, Флорентино бу «Бавария»даги Ҳарри Кейн ва Майкл Олисе эмаслигини айтган.

«Мен қандай суперюлдузни овлаётганимни сиз ҳеч қачон топа олмайсиз. Мадридликлар, сешанба кунига тайёрланинг. Ҳеч қачон умидларни пучга чиқармайман. Мақсадим – мухлисларни ҳайратда қолдириш. Мен Зидан, Фигу, Бекҳэм, Криштиану, Кака билан шартнома имзолаганман... Бу футболчи ўша тоифадан», – дея қўшимча қилди 79 ёшли функционер.

Шундан кейин ижтимоий тармоқларда Перес кимни назарда тутаётганини тахмин қилиш бошланди. Кўпчилик бу «ПСЖ» яримҳимоячилари Витиня ва Жоау Невешдан бири бўлишини тахмин қилди. Шунингдек, «Атлетико» ҳужумчиси Ҳулиан Алварес ва «Барселона» вингери Ламин Ямал вариантлари билдирилди.

Бошловчи ҳарчанд ҳаракат қилмасин, клуб раҳбари барибир карталарни олдиндан очишдан бош тортди.

«Мухлислар кутишига тўғри келади. Аввалига биз унинг клуби билан музокара ўтказишимиз керак. Рақибларимиздан фарқли ўлароқ, биз жиддиймиз», – дея қайд этган Перес.

Сўнгги сўзлари орқали у сайловдаги рақобатчиси Рикелменинг гўёки Ҳоланд «Реал»га ўтишни хоҳлаши, унинг шартномасида товон пули белгилангани ҳақидаги гапларига ишора қилди. Бу ҳолатда Эрлингнинг вакиллари тезда раддия беришганди.

«Унинг отаси, агенти ва клуб – барчаси айтишди: бу ёлғон. Барча бу сафсата эканини кўрди», – дея қайд этди Перес.

Флорентино клуб «Ливерпул» ҳимоячиси Ибраима Конате ва «Интер» латерали Дензел Думфрис билан келишиб қўйганини тасдиқлади. Шунингдек, у сайланадиган бўлса, Жозе Моуринио бош мураббий бўлиши ҳал қилинган масала.

«Жозе кейинги мавсум «Реал»да бўлади. У мени илҳомлантиради. Биз барчамиз уни таниймиз: у бизни рақобатлашишга ўргатган. У кетганидан кейин (Моуринио «Реал»да 2010-2013 йилларда ишлаган) биз олтита еврокубок ютдик – бу у йўлга қўйган рақобатбардошликнинг мевасидир. Ўйлаймизки, у ҳозир яна жамоага керак бўлган катализаторга айланиши мумкин. Жамоага ҳам қаттиқ, ҳам юмшоқ қўл керак, Моуриниода эса иккаласи ҳам бор эди. Мураббийга юқори даражадаги 25 нафар футболчидан иборат жамоани бошқариш осон эмас, лекин у буни уддалай олади», – дея хулоса қилди Флорентино.

«Реал» президентлиги учун сайловлар 7 июнга белгиланган.