Туркия 50 млн доза «Спутник V» вакцинасини сотиб олиш бўйича шартнома имзолади

Вакцинани етказиб бериш май ойидан бошланиши айтилмоқда.

Фото: Filip Filipovic/Getty Images

Туркия 50 млн доза «Спутник V» вакцинасини сотиб олиш бўйича шартнома имзолади. Бу ҳақда мамлакат соғлиқни сақлаш вазири Фахриддин Хўжа маълум қилди.

Унинг сўзларига кўра, ҳозирда вакцина фавқулодда вазиятларда қўлланилишига рухсат берилиши учун якуний синов босқичидан ўтмоқда.

Вакцинани етказиб бериш май ойидан бошланади, деб ёзади Reuters. 50 млн доза вакцинани олти ой давомида етказиб бериш режалаштирилган.

26 апрел куни Россия тўғридан тўғри инвестициялар фонди ва Туркиянинг Visсoran Ilac фармацевтика компанияси Туркияда «Спутник V» вакцинасини ишлаб чиқариш бўйича шартнома имзолади.

Пандемия бошланганидан буён Туркияда 4,7 млн киши коронавирус юқтирган, 39 минг нафар бемор вафот этган. Мамлакатда 17 майгача локдаун жорий этилди.