Байден президентлигининг илк 100 кунида энг бадавлат америкаликлар яна 195 миллиард долларга бойишди

Bloomberg ахборот агентлиги ўтказган ҳисоб-китобларга кўра, 100 нафар энг бадавлат америкаликнинг умумий бойлиги 30 апрелда 2,9 трлн долларга етди. Бу кўрсаткич Байден инаугурацияси ўтган 20 январдан бери 195 млрд долларга ошган. Шу билан бирга АҚШнинг энг кам даромадга эга 50 фоиз аҳолисининг умумий бойлиги ушбу кўрсаткичдан камроқни - 2,5 трлн долларни ташкил қилмоқда.

АҚШнинг асосий биржа индекслари феврал ойидан бери деярли узлуксиз равишда ўсиб бормоқда ва рекорд кўрсаткичларни қайд қилмоқда. Жумладан, Dow Jones ва S&P 500 индекслари бу вақт ичида 10 фоиздан кўпроққа ўсган.

Байден томонидан иқтисодиётни жонлантиришга қаратилган чораларнинг қабул қилиниши ва катта кўламли эмлаш иқтисодиётнинг тез тикланишига ва бунинг натижасида биржада нархлар ошиши ҳамда энг бадавлат америкаликлар бойлигининг кўпайишига олиб келди. Бироқ таъкидлаш жоиз, АҚШда бундай ижобий натижалар аввалги президент Дональд Трамп президентлик муддатининг охирги ҳафталарида ҳам кузатилган. 100 нафар энг бадавлат америкаликнинг бойлиги АҚШ президенти сайловлари ўтган 2020 йил 4 ноябрдан то Байден инаугурациясигача бўлган вақт ичида 267 млрд долларга кўпайган. 

АҚШ иқтисодиёти пандемиядан кейин кутилгандан тезроқ тикланмоқда. Прогнозларга кўра, АҚШ ялпи ички маҳсулоти жорий йилда 6,4 фоизга ўсади.